BAUCAU, 27 janeiru 2025 (TATOLI)—Sekretariadu Tékniku Administrasaun Eleitorál (STAE) fó-sai ona rezultadu husi eleisaun ba líder suku foun tolu hanesan Caibada Makasae, Builai no Ueru-Mata, iha munisípiu Baucau, iha-ne’ebé kandidatu na’in tolu eleitu sai xefe suku ba suku foun tolu iha primeira ronda.
Diretór STAE Baucau, Natividade Freitas Guterres, esplika kandidatura xefe suku ba suku foun tolu hamutuk na’in hitu kompostu mane neen no feto ida, ne’ebé rezulta hatudu liuhusi eleisaun iha sábadu (25/01/2025), kandidatu na’in tolu sai vensedór tanba ultrapasa bareira pursentu 50.
“Rezultadu eleisaun suku foun iha Baucau la akontese volta daruak tanba kandidatu sira ultrapasa bareira,” Diretór STAE Baucau hateten iha nia eskritóriu, Vila Nova, Baucau, segunda ne’e.
Natividade haktuir, husi suku Builai kandidatu Juvinal da Costa mak eleitu ho pursentu 52.35 husi votu 523. Husi Caibada Makasae, kandidatu Júlio Alegria Belo mak eleitu ho pursentu 56.87 husi votu 596 no husi suku Ueru-Mata kandidatú úniku Sabino Martins mak eleitu ho votu 264.
Totál eleitór ba suku foun tolu ne’ebé realiza eleisaun hamutuk 3.596, ho totál taxa partisipasaun 2.361 kompostu husi votu válidu 2.311, votu nulu 42. Suku Builai totál votante 1.025 husi eleitór 1.630. Caibada Makasae totál votante 1.058 husi eleitór 1.605. Ueru-Mata totál eleitór 278 husi votante 361.
Notísia relevante: Situasaun seguransa eleisaun suku iha Baucau kontroladu
Kandidatu hitu ne’ebé kompete iha eleisaun ba líder suku foun tolu kompostu husi Henrique Fernandes, João Quintas no Juvinal da Costa husi suku Builai. Caibada Makasae kompostu husi Geraldo da Costa, Juvinal Alegria Belo no Maria E. da Costa. Suku Ueru-Mata kandidatu úniku, Sabino Martins.
Suku Builai hamutuk aldeia haat hanesan Builai, Alala, Manulao no Samalaculiba. Suku Ueru-Mata iha aldeia ida mak Ueru-Mata. Caibada Makasae iha aldeia haat kompostu hosi Boru-baha, Caiobilale, Data-ua no Maulame
Estabelesementu suku foun iha Timor laran bazeia ba Lei Suku númeru: 19/2023 ne’ebé previstu iha artigu 91, fó kompeténsia ba Ministériu Administrasaun Estatál (MAE) deside kriasaun suku foun referidu.
Jornalista: Natalino Belo
Editór: Xisto Freitas da Piedade
