Situasaun seguransa eleisaun suku iha Baucau kontroladu
BAUCAU, 25 janeiru 2025 (TATOLI)—Komandu Polísia Nasionál Timor-Leste (PNTL) munisípiu Baucau relata situasaun iha sentru votasaun eleisaun suku foun tolu la’o hakmatek.
Komandante Interinu PNTL Munisípiu Baucau, Superintendente João Sancho Pires, haktuir parte seguransa kontinua akompaña prosesu distribusaun materiál eleisaun ne’ebé hahú kedas horisehik (24/01/2025) to’o atuál kontinua monitoriza iha terenu, iha-ne’ebé nota laiha indikasaun krime ruma iha kada sentru votasaun.
“Votasaun agora la’o hela no situasaun mós kontroladu hela. Laiha indikasaun krime ruma iha suku tolu ne’e,” Komandante interinu PNTL Baucau hateten iha suku Builai, Baucau, sábadu ne’e.
Notísia relevante: http://STAE distribui materiál ba suku foun iha Baucau, aban realiza eleisaun
Superintendente João Pires, konsidera situasaun seguransa kontroladu tanba komunidade husi suku foun tolu referidu kontribui kria pás no estabilidade tanba hakarak hili sira-nia líder foun liuhosi eleisaun suku.
PNTL hamutuk ho Autoridade Administrasaun Munisipál inklui ekipa Sekretariadu Tékniku Administrasaun Elitorál (STAE) Baucau halo observasaun komesa husi suku Ueru-Mata, Caibada Makasae no Builai hodi akompaña prosesu eleisaun suku foun ne’e.
Munisípiu Baucau realiza eleisaun suku foun tolu kompostu husi suku Builai hamutuk aldeia haat hanesan Builai, Alala, Manulao no Samalaculiba. Suku Ueru-Mata iha aldeia ida mak Ueru-Mata. Caibada Makasae iha aldeia haat kompostu hosi Boru-baha, Caiobilale, Data-ua no Maulame
Eleisaun suku foun iha Baucau ne’e sei envolve eleitór hamutuk 3.500 resin kompostu husi suku Builai eleitór 1.600 resin, Caibada Makasae 1.600 resin no Ueru-Mata hamutuk eleitór na’in 300 resin.
Kandidatura xefe suku hosi suku tolu ne’ebé mensionadu hamutuk na’in hitu kompostu mane neen, feto ida. Suku Builai kandidatu na’in tolu, Caibada Makasae na’in tolu (mane rua no feto ida), enkuantu suku Ueru-Mata iha kandidatu na’in ida.
Estabelesementu suku foun iha Timor laran bazeia ba Lei Suku númeru: 19/2023 ne’ebé previstu iha artigu 91, fó kompeténsia ba Ministériu Administrasaun Estatál (MAE) deside kriasaun suku foun referidu.
Jornalista : Natalino Belo
Editór : Xisto Freitas da Piedade
