DILI, 30 Janeiru 2025 (TATOLI) – Konsellu Ministru (KM) delibera hodi fó instrusaun ba Ministru Administrasaun Estatál (MAE), Tomás Cabral, reprezenta Estadu, hodi notifika ajudikatária iha kontratu públiku LCB/006/MAE/2020 no LCB/007/MAE/2020, kona-ba jestaun rezíduu sólidu urbanu no lixeira Tíbar.
“Ohin ita delibera ba kontratu kontratu públiku LCB/006/MAE/2020 no LCB/007/MAE/2020, kona-ba jestaun rezíduu sólidu urbanu no lixeira Tibar, hodi kumpre sira-nia obrigasaun kontratuál iha prazu másimu loron 15 nia laran”, Vise-Ministru ba Asuntu Parlamentár, Adérito Hugo da Costa, hateten iha Palásiu Governu, ohin.
Nia esplika razaun Governu delibera tiha kontratu ne’e tanba hothotu hatene Governu dezde nia entrada halo hela avaliasaun ba jestaun lixu iha Tíbar ba empreza internasionál ida (China Harbour) no nasionál rua (Pax no Pioner) mak hetan kontratu dezde Governu anteriór nia tempu, husi 2022 to’o 2023. Maibé, iha Governu atuál haree iha kompleksidade kontratu ne’e, entaun seidauk bele halo revizaun konkreta no sei halo avaliasaun ba termu sira iha kontratu ba jestaun lixu nian.
“Imi hotu haree iha kompleksidade kontratu ne’ebé iha. Ita refleta ba prátika kontratu ne’e halo iha 2022 to’o agora nia implementasaun iha terrenu seidauk efetivu. Ida-ne’e afeta tebes ba lixu, tanba jestaun lixu iha kaptál Dili ne’ebé tinan hira ikus ne’e sai problemátiku loos”, Adérito hateten.
Nia salienta bainhira empreza tolu ne’e hetan ona kontratu maka iha obrigasaun husi Estadu halo avaliasaun ba kontratu, maske sira seidauk serbisu efetivu iha terrenu, maibé kontratu ne’e selebra ona, entaun iha kualkér fleksibilidade Governu presiza atu haree.
“Durante ne’e serbisu preparativu sira-nian iha terrenu seidauk kompletu, maibé pagamentu la’o ona tanba kesi ho kontratu ne’ebé halo iha VIII Governu. Nune’e, mai iha tempu XI Governu haree katak iha kompleksidade halo avaliasaun akompañamentu no fó daudaun ona autorizasaun iha primeira faze kontratu ne’ebé nia implementasaun iha agostu 2023. Depoizde autorizaun iha faze dahuluk, sira-nia obrigasaun atu kompleta rekizitu sira ne’ebé selebra iha VIII Governu to’o agora”, esplika.
Iha semana kotuk, Primeiru-Ministru, Xanana Gusmão, rasik bá vizita sentru jestaun lixu iha Tíbar, nomós postu sira ne’ebé rekolla fo’er tuir akordu ne’ebé iha la hatudu mudansa ba jestaun lixu ne’ebé signifikante tebes.
“Nune’e ohin Governu deside halo deliberasaun ba kontratu públiku LCB/006/MAE/2020 no LCB/007/MAE/2020. Nune’e, fó fali biban ba Governu, liuliu Ministériu Administrasaun Estatál no ministériu relavante sira iha posibilidade halo fali preparativu ba kontratasaun foun ka konkursu públiku foun ba empreza foun sira ne’ebé mai bele fornese fali serbisu efetivu ho modelu kontratu ne’ebé mai ho balansu”, realsa.
Jornalista: Arminda Fonseca
Editora: Maria Auxiliadora
