COVALIMA, 04 fevereiru 2025 (TATOLI)- Dirasaun Servisu Investigasaun Kriminál (DSIK) PNTL nasionál halo investigasaun ba veteranu no Komisáriu-membru Konsellu Kombatente Libertasaun Nasionál (CCLN, sigla portugés) Covalima iha Komandu PNTL (Polísia Nasionál Timor-Leste), Covalima
Komandante DSIK PNTL, Superintendente João Belo dos Reis, klarifika, prezensa DSIK mai iha Covalima, relasiona DSIK nasionál simu keixa husi Komisáriu Membru CCLN ne’ebé hato’o iha Investigasaun Kriminál Nasionál kona-ba vídeo ne’ebé publika iha mídia sosiál.
“Bazeia ba vídeo ne’ebé públika iha mídia sosiál no simu keixa husi Komisáriu-membru CCLN Munisipál, Francisco Doutel Sarmento “Lamesak “ entaun ami mai ajuda investigasaun munisípiu atu rekolla informasaun ba parte ne’ebé envolve hodi fó komentáriu”, João Belo dos Reis hato’o ba jornalista sira, iha Santa Rosa, ohin.
Nia dehan, DSIK PNTL Nasionál mai iha Covalima atu fasilita prosesu atu bele aprezenta ba Ministériu Públiku (MP) no kontinua aprezenta ba Tribunál (TR) tuir kuridór.
Komisáriu-Membru Kombatente Libertasaun Nasionál munisípiu (MCCLN), Francisco Doutel Sarmento “ Lamesak” reforsa katak, nia prezensa iha Komandu PNTL atu presta deklarasaun ba Dirasaun Servisu Investigasaun Kriminál (DSIK) PNTL Nasionál, iha komandu Polísia Nasionál Timor-Leste.
“Ohin ha’u mai presta deklarasaun ba Dirasaun Servisu Investigasaun Kriminál (DSIK) PNTL, hodi foti dadus bazeia ba públikasaun vídeo ne’ebé víral iha mídia sosial halo ha’u halo kombransa maibé ida-ne’e la loos “Francisco Doutel Sarmento “ Lamesak” hato’o hafoin presta deklasaun
Ho vídeo ne’ebé viral iha mídia sosiál, presiza iha evidénsia baihira la iha evidénsia halo difamasaun ida-ne’e la di’ak, tanba ema hotu iha lei nia okos. Uluk hala’o funu la’ós tanba ambisaun atu hetan kargu, maibé halo funu tanba Covalima–oan.
“Ha’u la hirus sira durante ne’e iha fallansu téknika la’o ha’u nia hakarak, maibé Ministériu nia servisu. Ha’u verifika de’it naran, maibé ministériu mak fó rezultadu to’o ikus dehan ha’u mak halo esplorasaun no kobra imi-nia materiál” nia dehan.
Notísia relevante:Lamesak dezmente halo kombransa ba veteranu sira iha Covalima
Jornalista: Celestina Teles
Editór: Rafael Ximenes de A. Belo
