DILI, 12 Fevereiru 2025 (TATOLI)–Prezidente Klube Coração FC, Abrão Nokosiku Saladanha, hateten daudaun ne’e klube halo hela preparasaun hodi kompete iha Liga Futeból Timor-Leste (LFTL) époka 2025 ne’ebé sei realiza iha fulan-abríl mai ne’e.
Notísia Relevante: AAFTL prepara árbitru lisensa B na’in-36 ba Liga Futeból Timor-Leste
“Sábadu semana kotuk, ami reuniaun, realiza mós asembleia ida sosiu no fundadór sira hili ha’u mak sai hanesan Prezidente ba klube ne’e hodi troka Prezidente sesante ne’ebé daudaun ne’e asume ona kargu iha Federasaun Futeból Timor-Leste (FFTL). Ha’u-nia mandatu hanesan Prezidente hahú 2025-2029. Ha’u-nia Sekretariu Jerál mak Carlos Mateus Ximenes, nune’e ami halo ona preparasaun atu kompete iha liga tinan ida-ne’e nian,” Abrão hateten ba Agência TATOLI, iha Parlamentu Nasionál, tersa (11 janeiru 2025) ne’e.
Nia dehan, daudaun ne’e kontaktu másimu ona ho ekipa tékniku klube nian hodi halo preparasaun ba jogadór sira.
“Bainhira eleitu ba Prezidente klube, ami ko’alia kedan ho ekipa tékniku klube nian maske iha difikuldade uitoan, maibé la hamate ami-nia vontade. Jogadór sira prepara ona, hein de’it atu hala’o treinamentu,” nia dehan.
Atu hatene klube nia forsa, nia hateten, domingu semana oin klube Coração sei hala’o jogu amigavel kontra selesaun nasionál seniór iha Munisípiu Baucau.
Nia afirma, klube halo preparasaun maibé tuir de’it kapasidade klube nian no jogadór klube foti de’it jogadór lokál no sei la sosa jogadór estranjeiru tanba laiha finansiamentu ne’ebé másimu.
“Ami halo preparasaun tuir ami-nia kapasidade, jogadór maioria timoroan, ita haree mós ba kapasidade finanseiru. Jogadór, ami presiza tan mak liña kotuk. Ami-nia guarda rede mós ba servisu iha rai-li’ur, ida-ne’e mós sai difikuldade mai ami. Maibé, ami sei buka atu kompleta antes hakat ba liga,” nia hateten.
Notísia Relevante: LFTL-FFTL hahú diskute asuntu tékniku-kalendáriu realiza liga
Jornalista : Hortencio Sanchez
Editór : Cancio Ximenes
