DILI, 25 Fevereiru 2025 (TATOLI)—Embaixadora Xina ba Timor-Leste, Wang Wenli, hateten Governu Xina aprova ona akordu kooperasaun Governu Timor-Leste ho Governu Xina atu harii ospitál militár andar ualu iha Dili.
“Kona-ba ospitál andár ualu ba militár no veteranu ne’e, hetan ona aprovasaun husi Governu Xina. Iha akordu ne’e, la’ós de’it konstrui ospitál maibé konstrui mós jardin iha tasi ibun,” Wang Wenli hateten ba jornalista sira hafoin reuniaun tripartida entre Embaixada Xina, Komandu PNTL inklui Asosiasaun Emprezária Xina iha Timor-Leste ba daruak ne’ebé hala’o iha Embaixada Xina, Dili, tersa ne’e.
Nia dehan, tempu badak Governu Xina sei loke konkursu ba konstrusaun ida-ne’e, nune’e empreza bele hahú servisu.
“Tuirmai, ami sei loke konkursu ba kompañia konstrutora sira hodi realiza obra ida-ne’e,” nia adianta.
Rekorda fali katak Ministru Defeza Kontra Almirante, Donaciano Costa Gomes “Pedro Klamar Fuik” iha loron 9 fulan-Janeiru 2025, hateten Governu Xina aseita ona katak sei harii ospitál militár andár ualu. Nune’e, Ministériu Defeza sei kria komisaun hodi tau-matan ba konstrusaun ospitál referida.
Jornalista: Natalino Costa
Editór: Xisto Freitas da Piedade
