KOVALIMA, 06 Marsu 2025 (TATOLI) – Eskola Bázika Sentrál (EBC), Suai Loro, presiza aumenta sala-de-aula, tanba sala-de-aula ida bele akumula alunu 40-resin to’o 80.
Diretór EBC Suai Loro, Fernando António informa katak ho númeru alunu barak eskola halo jestaun, manorin sira hanorin alunu turnu dadeer no turnu lorokraik atu garante kualidade prosesu aprendijazen ba alunu sira.
“Regra normál sala-de-aula ida akumula alunu 25 de’it se liu ita la foku atu hanorin tanba barullu entaun presiza atu fó atensaun másimu hodi aumenta sala-de-aula daudaun ne’e EBC Suai Loro iha sala-de-aula 11”, Dirijente Eskola ne’e dehan ba TATOLI iha Kamenasa, ohin.
Presiza aumenta sala-de-aula 12, nia dehan, eskola hakarak turnu ida de’it lakohi fahe ona turnu dadeer ho lorokraik atu garante atividade letiva ne’ebé di’ak liu ba alunu sira.
Tuir dadus, alunu iha EBC Suai Loro hamutuk 644 ho nia profesór hamutuk 32. Husi númeru ne’e, profesór na’in tolu mak tama ona iha lista reforma.
Profesór ne’ebé tama iha lista reforma durante ne’e hanorin alunu ho disiplina hanesan Jeografia, Matemátika no seluktan tanba ne’e presiza atu troka sira.
Kona-ba problema referidu, dirijente eskola hato’o bebeik ona hodi aumenta sala-de-aula ba Edukasaun presiza aumenta maibé to’o ohin loron seidauk iha rezultadu.
Iha sorin seluk, Diretora Servisu Edukasaun Munisípiu Kovalima Elda de Fatima klarifika katak Servisu Edukasaun submete ona proposta ba Ministériu Edukasaun ba estabelesimentu ensinu sira ne’ebé mak atu aumenta sala-de-aula.
“Kona-ba eskola ne’ebé presiza aumenta sala-de-aula ita-nia tékniku sira mós submete ona relatóriu eskola sira hanesan EBC Suai Loro Gala no Halik hato’o ona pedidu submete ona atu aumenta edifísiu eskola tuir ne’e eskola 11”, nia esplika.
Jornalista:Celestina Teles
Editór: Rafael Ximenes de A. Belo
