DILI, 12 Marsu 2025 (TATOLI)- Komisaun Juventude Katólika Arkiodioseze Dili (COJUCAD, sigla portugés) realiza formasaun ba joven kada parókia no vigrária arkiodioseze Dili, hamutuk na’in tolu nulu-resin tolu iha ámbitu ba preparasaun tinan Jubileu 2025.
Objetivu husi formasaun tinan Jubileu ida-ne’e atu fó esperansa ba joven sarani Katólika sira kona-ba temátika lubuk ida hanesan, litúrjia, eukarístia, anu Jubileu, administrasaun parokiál no prepara kongresu iha parókia.
“Karakterístika Jubileu ne’e mak primeiru orasaun, tuirmai formasaun, eukarístia no asaun ida-ne’e mak karakterístika husi Jubileu nian”, Diretór COJUCAD, Pe. Cirilio dos Santos Maia hateten, iha salaun formasaun COJUCAD, ohin.
Formasaun ne’ebé hanorin juventude sira atu tatoli informasaun kona-ba igreja nian ba sira iha kada parókia no ikus mai ami bele hetan feedback (efeitu) fali husi parókia
“Juventude sira ne’ebé partisipa iha formasaun ne’e sai hanesan matadalan ida, bainhira hetan informasaun iha ne’e, sira bele hato’o fali ba sira-nia amu pároku iha kada parókia no ikusmai ami mós bele hetan fali informasaun husi amu pároku sira”, amu esplika.
Iha fatin hanesan, Partisipante Vigrária Dili-Leste, Estevão da Silva Amaral de Matos hateten, importánsia husi formasaun ne’e atu aprende kona-ba doutrina igreja nian, liuliu hanesan joven eukarístiku.
“Pontu importante husi formasaun ne’e mak atu aprende kona-ba doutrina igreja Katólika nian no oinsá atu motiva sai joven ne’ebé eukarístiku”, nia dehan.
Enkuantu formasaun ne’e tama ona iha faze daruak nian, ne’ebé iha faze daruak nia hala’o durante loron tolu, partisipante sira ne’ebé partisipa kompostu husi vigrária Ainaro, Vigrária Dili-Leste no parókia Pasabé. No, formasaun faze datoluk sei kontinua iha loron 23 fulan ne’e hodi termina formasaun episkopál anu Jubileu, tinan-2025.
Jornalista: Alexandra da Costa
Editór: Rafael Ximenes de A. Belo
