VIKEKE, 21 Marsu 2025 (TATOLI)--Koordenadór Bee Timor-Leste, Empreza Públika (BTL,E.P), Marito da Costa, relata, projetu sistema bee-moos ne’ebé implementa iha tinan 2024 iha postu Uatukarbau foin atinji ba 15%.
“Tanba iha implementasaun ne’e ita hasoru problema sosiál ne’e barak liu, nune’e iha fulan kotuk ami tenta rezolve. Tanba ne’e mak ninia progresu serbisu fíziku ne’e kiik liu, maibé ita-nia empreza kontinua esforsu halo serbisu,” Marito da Costa, informa ba Agência Tatoli, iha ninia knaar fatin, Beloi, sesta ne’e.
Empreza sira daudaun ne’e harii ona tanke presaun rutura hamutuk unidade hitu no sei kontinua instala kanu transmisaun ba tanke sira-ne’e.
“Konstrusaun tanke rezervatóriu seidauk konstrui tanba sei kaer husi empreza seluk. Nune’e ba obra sistema bee-moos ba tinan ida-ne’e, ha’u sente seidauk ramata tanba mobilizasaun materiál ba bee-matan Uaibati ne’e distánsia dook no konsdisaun dalan mós ladun di’ak, ne’ebé la garante tinan ida-ne’e finaliza serbisu,” nia akresenta.
Notísia relevante : BTL, E.P kontrata empreza tolu mellora sistema bee-moos iha Lacluta no Maubara
BTL,E.P daudaun ne’e dezloka supervizór na’in-rua iha postu Uatukarbau hodi akompaña projetu referida.
Projetu ne’e rasik lansa iha loron 28 Agustu 2024, ne’ebé obra ne’e gastu orsamentu totál hamutuk $1.334.472,12 ne’ebé konstrui husi empreza Helfia Unip LDA ho durasaun serbisu tinan ida.
Obra ne’e sei benifisia ba uma-kain 985 ho totál populasaun 1.910, ne’ebé sei distribui ba postu saude, eskola, merkadu no igreja.
Iha fatin ketak, Xefe suku Irabin de Baixo, José Baptista do Carmo, haktuir, serbisu dadaun ne’e iha terenu empreza responsavél sei kontinua serbisu no sira harii ona tanke presaun rutura hamutuk unidade lima.
“Konstrusaun sistema bee-moos iha ami-nia suku daudaun serbisu la’o hela. Foin lalais semana ida, serbisu para tiha tanba materiál no klima udan, maibé agora serbisu la’o filafali ona, ami autoridade lokál kontinua akompaña serbisu no ami husu sira aselera serbisu atu nune’e ita-nia komunidade bele asesu ba bee-moos,” nia katak.
Jornalista : Vitorino Lopes da Costa
Editór : Cancio Ximenes
