DILI, 21 Marsu 2025 (TATOLI)-Diretór Servisu Edukasaun Munisípiu Ainaru, Patrício da Costa Magno, informa Eskola Ensinu Báziku hamutuk 10 no Pre-eskolár hitu mak asesu ona merenda eskolár iha fulan Marsu ne’e, restante seidauk tanba fallansu iha sistema finanseiru.
“Merenda eskolár iha Ainaru ita iha ensinu báziku 10 ne’ebé mak halo ona levantamentu no merenda eskolár la’o ona iha fulan Marsu ne’e, inklui ensinu pre-eskolár hitu, ensinu báziku seluk inklui ensinu pre-eskolár seluk ne’e seidauk asesu tanba sira-nia orsamentu falla iha sistema finanseiru”, dehan diretór servisu edukasaun munisípiu Ainaru iha Vila-Verde, sesta ne’e.
Nia hatutan, merenda eskolár implementa liuhusi Autoridade Munisípiu, tanba ne’e mak sira ezije ba autoridade munisípiu Ainaru atu prosesa lalais eskola sira seluk ne’ebé seidauk asesu merenda eskolár ne’e nia osan, nune’e estudante hotu iha direitu ne’ebé hanesan.
Nia akresenta, servisu edukasaun munisípiu Ainaru aloka orsamentu hamutuk millaun ida resin ba programa merenda eskolár, ho nia benefisiariu hamutuk rihun 18 resin iha tinan 2025.
“Benefisiáriu hamutuk rihun 18-resin ne’e hahú husi Ensinu Pre-eskolár to’o Ensinu Báziku públiku no privadu, no grupu Ekipa Jestaun Programa (EJP) ne’ebé oferese ai-han ba ita-nia oan sira hamutuk 21”, nia informa.
Governu liuhosi Ministeriu Administrasaun Estatal alokadu fundu ho montante miliaun $34 ba programa merenda eskolar iha territoriu.
Notísia relevante: Benefisiáriu merenda eskolár iha Ainaru rihun 18-resin
Jornalista : Osória Marques
Editora : Rita Almeida
