KOVALIMA, 24 Marsu 2025 (TATOLI) –Veteranu hamutuk na’in-75, iha munisípiu Kovalima asesu kréditu iha Banku Nasionál Komérsiu Timor-Leste (BNCTL) no Banku Nasionál Ultramarino (BNU), inklui instituisaun finanseira Kaebauk.
Sekretáriu Konsellu Kombatente Libertasaun Nasionál Munisípiu Kovalima, Joaquim da Costa Barros, relata katak, Konsellu Veteranu munisípiu Kovalima rejista veteranu ne’ebé asesu kreditu tanba durante ne’e konselu fasilita veteranu halo karta.
“Ita-nia Kombatente ne’ebé kategória 8 a 14 no família ne’ebé simu martir nia pensaun kada fulan no sai benefisiáriu asesu kréditu iha banku hamutuk na’in-75”, Joaquim da Costa Barros, dehan ba Jornalista, iha edifísiu kombatente munisípiu Kovalima, Tabakolot, ohin.
Veteranu no família ne’ebé simu pensaun martir na’in-75 ne’e asesu kréditu iha Banku Nasionál Komérsiu Timor-Leste (BNCTL) benefisiáriu 61, Banku Nasionál Ultramarino (BNU) sia, Kaebauk lima.
Kombatente Libertasaun Nasionál Kovalima ne’ebé asesu kréditu banku iha Kovalima, uza hodi selu sira-nia oan nia eskola, balun konstrui uma no balun uza hodi sosa transporte hodi fasilita sira halo movimentu ba mai.
Sekretáriu ne’e esplika katak veteranu sira ne’ebé atu asesu kreditu, tanba kritéria husi Banku Nasionál Komérsiu Timor-Leste presiza submete dokumentu deklarasaun husi Konsellu Kombatente Munisípiu Kovalima hodi fasilita veteranu sira atu asesu kréditu iha banku.
Tuir dadus iha konsellu Kombatente libertasaun Munisípiu Kovalima katak, vetetanu no martir ne’ebé maka durante asesu pensaun hamutuk 1300-resin.
Jornalista: Celestina Teles
Editór: Rafael Ximenes de A. Belo
