KOVALIMA, 27 Marsu 2025 (TATOLI) – Xefe Estadu Timor-Leste, José Ramos Horta, akompaña husi membru Governu sira entrega mákina suku roupa, bolu, osan no nesesidade sira seluk ba Sentru Esperansa ba feto, iha Suku Maudemo, Postu administrativu Tilomar, Munisípiu Kovalima.
Molok atu fó apoiu mákina, xefe Estadu fó apoiu nesesidade bázika ho espesiál ba família kbiit naton iha suku Beiseuk, Lalaua no iha Sentru Esperansa iha uma Mahon Salele, Suku Maudemo, iha Postu Tilomar.
“Ohin iha fatin barak hodi fó tulun ba defisiénsia, komunidade membru vulnerável mai husi prezidensia fó tulun hanesan ha’u-nia konsiénsia hodi buka ajuda labarik sira hetan violénsia no família moris iha difikuldade” , Xefe Estadu hato’o iha uma mahon Salele, ohin.
Xefe Estadu dehan, nia vizita Suai iha kedas tempu Portugés no iha tempu independénsia hanesan PR mai iha Kovalima la’ós buka atu harii partidu.
Horta klarifika prezensa vizita munisípiu la’ós prepara atu harii partidu, tanba ema balun krítika, maibé nia parte la harii partidu ruma.
Xefe Estadu entrega nesesidade bàzika, espesiál no màkina suku roupa no bolu mai husi Estadu hamutuk ho Governu hodi hamenus inan-aman no avó sira-nia susar.
Nesesidade espesiál ne’ebé fó apoiu hetan apoiu husi komunidade Japaun, Koreia no amigu husi nasaun seluktan.
“Mai fahe hahan ba família kbiit naton ne’ebé oferta husi ha’u-nia amigu husi Japaun Nipon foundation”, PR informa.
Tuir ajenda hafoin fila husi postu Tilomar Xefe Estadu komitiva kontinua vizita kompetisaun korrida kavalo iha kampu Suai Loro.
Jornalista:Celestina Teles
Editór: Rafael Ximenes de A. Belo
