DILI, 17 Abríl 2025 (TATOLI) – Ministériu Obra Públika (MOP) sei halo melloramentu ba estrada kuak sira besik pontu 100 iha Dili depoizde loron Páskua.
Diretora Nasionál Manutensaun no Konservasaun Via Rodoviária MOP, Letígia Hanjam Corbafo, hateten dalan kuak sira ne’e daudaun empreza Montana Di’ak ko’a ona no sei taka ho alkatraun manas (Asphalt Hot Mix) no alkatraun malirin (Asphalt Cold Mix).
“Ba alkatraun manas ne’e MOP kontrata empreza Montana di’ak ne’ebé iha kapasidade fábrika alkatraun manas hodi atende ba rekuperasaun pavimentu sira ne’ebé iha ona estragu ka desconfort ho dimensaun liu metru rua”, dehan.
Ba alkatraun malirin ne’e, Diresaun-Jerál Estrada, Ponte, Prevensaun no Kontrolu Seia no Institutu Jestaun Ekipamentu no Apoiu Dezenvolvimentu Infaestrutura (IGEADI) mak sei halo hodi taka ba dalan kuak (potholes) sira ne’ebé ki’ik liu metru 2 kuadradu.
Nia haktuir katak daudaun tékniku sira monitoriza no sei kontinua reabilita dalan sira ho fazeadamente hodi evita engarrafamentu iha kapitál.
Letígia Hanjam esplika razaun utiliza materiál diferente, tanba alkatraun manas fábrika ho kuantidade ne’ebé boot no presiza kontrola nia temperatura labele menus 100 degraus, nune’e ho komplexidade ténika atu hadi’a pavimentu alkatraun presiza haree ba nia kuantidade ka volume hodi implementa.
Ba materiál alkatraun malirin ne’e halo akizasaun husi fábrika ne’ebé iha ona embalajen laran no hein implementa de’it.
“Materiál referidu ita iha ona kuantidade sufisiente hodi implementa la’ós de’it ba pavimentu estrada iha Dili, maibé ba mós iha pavimentu estrada nasionál liga entre munisípiu. Alkatraun malirin implementa ba pavimentu sira ne’ebé kuak ka nakfera ho dimensaun ki’ik ka menus husi metru 2 kuadradu”, salienta.
Iha sorin seluk, Ministru Obra Públika, Samuel Marçal, dehan estrada sira ne’ebé daudaun ke’e kuak ona ne’e la’ós atu taka ho simentu, maibé tau de’it base course hodi hein kompañia halo produsaun ba alkatrauun maka taka dala-ida de’it.
Nia esplika katak daudaun empreza ke’e dalan kuak no husik hela, seidauk tau alkatraun tanba sira atu halo produsaun ba alkatraun ne’e tenke sura pelumenus to’o tonelada 10 hanesan ne’e mak foin bele prodús hodi taka dalan kuak.
“Agora, ita tau uluk base course lai, sura ba to’o ona ton ne’ebé presiza mak ita prodús dala-ida, nahe kalan ida bele halo hotu kedas maski iha fatin ne’ebé lahanesan”, afirma.
Jornalista: Arminda Fonseca
Editora: Maria Auxiliadora
