DILI, 22 Abríl 2025 (TATOLI)– Eis-Primeiru-Ministru, Marí Alkatiri, hateten Papa Francisco nu’udar mensajeiru ba Fraternidade Umana nian.
“Papa Francisco husik mai ita eransa ida atu hahú hateke ba mundu ho vizaun foun no diferente. Papa nu’udar mensajeiru ba fraternidadi umana, solidariedadi, ne’ebé ema hotu-hotu merese tratamentu hanesan ho direitu hanesan ba justisa, hakotu nia jornada ba libertasaun ba umanidade tomak”, Alkatiri hateten iha nota ne’ebé TATOLI asesu, ohin.
Antigu primeiru-ministru ne’e dehan mundu tomak lakon líder Kreda Katóliku ida ho hanoin, hafoun kle’an tebes ba dame no ba salvasaun umanidade tomak, rohan-la’ek.
“Papa Francisco hili dalan foun ho obstákulu oin-oin atu loke dalan boot ba hamihis diferensa atu sai fondasi ba harii mundu ida ba ema hotu, kaer ba ida-ne’e, iha teoria no prátika ekuméniku iha mundu relijiaun nian. Deskansa ho Pás
Amu Papa Francisco,” Alkatiri konklui.
Papa Francisco hakotu iis segunda (21/4/2025). Santu Padre nia mate hakotu nia ukun durante tinan 12 nu’udar líder másimu Igreja Katólika nian.
Segunda dadeer semana ne’e, iha Roma nakfilak ba momentu lutu nian ba mundu katóliku. Iha tuku 7:35 dadeer oras lokál iha loron 21 fulan-Abril tinan 2025, sinál sira mate nian lian husi Bazílika Saun Pedro nian, hodi fó sai katak Papa Francisco mate ona ho tinan 88.
Francisco, Papa dahuluk husi Amérika Latina
Papa Francisco halo istória barak. Nia maka Amu Papa dahuluk husi Amérika Súl, nune’e mós Papa dahuluk husi orden Jezuíta nian. Nia eleitu nu’udar Papa iha loron 13 fulan-Marsu tinan 2013, hodi troka Papa Bento XVI ne’ebé hili rejigna-aan, tanba razaun sira saúde nian – movimentu ida ne’ebé iha momentu ne’ebá halo mundu tomak hakfodak.
Durante tinan 12, Papa Francisco koñesidu nu’udar líder ida ne’ebé laran-manas, haraik-aan, maibé aten-barani hodi hato’o justisa sosiál, dame, no preokupasaun entre relijiaun sira. Nia loke espasu ba diálogu ho komunidade musulmana, judeu no mós ateu sira. Nia vizita área konflitu sira, kampu refujiadu sira, no nasaun sira ho maioria la’ós katóliku, hodi lori mensajen domin no perdaun inkondisionál.
Tempu balun molok nia mate, Papa Francisco hetan kuidadu intensivu iha Ospitál Gemelli, Roma, tanba infesaun pulmaun ne’ebé maka’as. Nia presiza oksijéniu ho fluxu aas no transfuzaun raan tanba anemia. Médiku, Sergio Alfieri, antes ne’e konsidera ona risku sepsis nian hanesan ameasa boot ida ba Amu Papa, tanba nia idade avansada no kondisaun krónika sira ne’ebé akompaña.
Papa Francisco nia eransa la reflete de’it iha dokumentu igreja nian ka desizaun doutrina sira. Nia mós husik hela legadu morál no espirituál ne’ebé dura, bolu ida ba moris simples, solidariedade ho ema ki’ak sira, no aten-barani atu ko’alia iha mundu ida nia oin ne’ebé dalabarak indiferente ba valór umanu sira.
Bandeira Vatikanu nian agora semo iha meia-mastru. Fiar-na’in rihun ba rihun halibur iha Prasa Saun Pedro, hodi hakruuk sira-nia ulun hodi reza. Mundu lakon ona líder ida, maibé nia mensajen sei kontinua iha ema barak nia fuan, iha relijiaun no kontinente sira.
Notísia relevante: Papa Francisco inspiradór pás, justisa no fraternidade entre povu
Jornalista: Hortencio Sanchez
Editór: Cancio Ximenes
