BAUKAU, 22 Abríl 2025 (TATOLI)-Bispu Dioseze Baukau, Don Leandro Maria Alves konsidera Papa Francisco nia mate iha loron moris hi’as nian tanba hakotu iis iha loron daruak selebrasaun festa paskua, ida ne’e hatudu Maromak nia domin boot.
“Iha paskua ita selebra ressurreisaun (moris-hi’as), ita hotu haksolok Jesus terus mate no moris hi’as, ita haree ema Santu sira-nia mate, sempre iha momentu sira hanesan ne’e, ita bele dehan hatudu momentu moris nian”, Bispu hatete iha vila antiga, tersa ne’e.
Nia mos hato’o sentidu pézames ba Papa Francisco nia falesimentu ho esperansa ema hotu hamutuk ho Kristu sei moris hi’as.
Bispu espresa Igreja Katólika lakon ninia lideransa, lider espirituál ne’ebé akumula no hakuak ema hotu atu hakbesik-an ba Maromak.
Sarani Timor, Bispu hatutan ninia-fuan hatudu domin ba Papa Francisco. Kariñu ne’e mostra liuhusi vizita durante loron tolu iha Timor-Leste.
Liuhusi komunikadu, Diozese Baukau konvida sarani hotu atu partisipa misa ba Papa Francisco iha loron sábadu, 26 Abríl dadeer iha Igreja Pro-Katedrál Diozese Baukau.
“Misa ne’e atu reza, husu Maromak nia laran luak hodi bele simu Amu Papa Francisco nia klamar iha Na’i Maromak nia kadunan”, Don Leandro akresenta.
Papa Francisco hakotu iis iha loron segunda, 21 Abríl 2025, tuku 07:35 oras Vatikanu nian. Oras Vatikanu ho oras Timor-nian diferente oras hitu.
Papa Francisco mate ho idade-88, tanba derrame serebrál, koma no kardiorrespiratória mak para.
Notísia relevante: Papa Francisco sei haloot iha Bazílika Santa Maria Maggiore tuir nia legadu espirituál
Jornalista : Natalino Belo
Editora : Rita Almeida
