DILI, 23 Abríl 2025 (TATOLI) – Mate-isin Papa Francisco translada ona husi nia rezidénsia Casa Santa Marta bá Bazílika São Pedro, Vatikanu, iha kuarta-feira dadeer, tuku 9h00 oras Roma nian (iha Timor-Leste tuku 16h00).
Transladasaun mate-isin Papa nian ba Bazílika Vatikanu ne’e atu sarani sira bele fó nia omenajen ikus to’o loron hakoi nian iha sábadu, 26 Abríl ne’e.
Iha prosesu transladasaun Papa Francisco nia mate-isin, Koléjiu Kardeál no sarani hamutuk rihun 20 mak akompaña hodi fó omenajen, haktuir nota husi Vatikanu.
Kardeál Kevin Farrell, Camerlengo Santa Igreja Romana, mak prezide ritu transladasaun ne’e iha kapela Casa Santa Marta ho orasaun ba Papa Francisco nia klamar.
Iha orasaun abertura nian, Kardeál Farrell agradese ba Maromak ba Papa nia misaun durante tinan 12.
“Mai ita harohan ba Nia, ho Nia domin no bondade, atu fó ba maktoban Papa fatin rohan-la’ek iha reinu lalehan, no atu fó ksolok ho esperansa selestiál família papál, Igreja Romana, no fiél sira iha mundu tomak”, dehan.
Dekanu kardeál depois prezide prosesu transladasaun kaixaun liuhusi Prasa Santa Marta, Prasa Mártir Romanu, Arku Sinu, no Prasa São Pedro.
Tuir notísia husi Antara, bainhira Papa nia kaixaun liu, sarani sira basa-liman ho neineik, kaixaun Papa nian ne’ebé nakloke, ne’ebé uza batina mean, no lori sa’e bá eskada hodi tama bá Bazílika São Pedro.
Kaixaun Papa nia tau iha Altár Konfisaun nia oin, no koru hananu múzika Ladainha de Todos os Santos iha lia-latina ba Papa nia klamar.
Kardeál Farrel depois dirije Liturgia da Palavra, ne’ebé inklui leitura husi Evanjellu São João (17:24-26) kona-ba orasaun saserdotál Jesus Kristu ne’ebé proklama Maromak nia domin ba Nia no nia segidór sira.
Serimónia ne’e hakotu ho knananuk Salve Regina, inu Maria ne’ebé hahú ho Salve, Rainha Santa, Mãe de Misericórdia.
Membru dekanu kardeál depois fó omenajen ikus ba maktoban Papa Francisco, tuirmai sarani sira ne’ebé halibur iha Bazílika São Pedro.
Bazílika sei loke to’o meia-noite no iha loron 24 tuku 7h00 dadeer loke fali no taka iha meia-noite. Iha 25 Abríl, nafatin loke iha tuku 7h00 dadeer to’o tuku 19h00 oras Vatikanu atu fó oportunidade ba sarani sira reza ba Papa.
Misa funerál Santu Padre sei hala’o iha Prasa São Pedro iha tuku 10h00 (iha Dili tuku 5 loraik), iha 26 Abríl, ne’ebé prezide husi Kardeál Giovanni Battista Re, Dekanu Koléjiu Kardinalísiu.
Depoizde misa hotu, mate-isin Papa nian sei lori bá Bazílika Santa Maria Maggiore iha Roma, Itália, iha fatin ne’ebé sei haloot tuir nia legadu espirituál.
Notísia relevante: Papa Francisco sei haloot iha Bazílika Santa Maria Maggiore tuir nia legadu espirituál
TATOLI
