DILI, 24 Abríl 2025 (TATOLI) – Institutu Nasionál Estatístika Timor-Leste, Institutu Públiku (INETL, I.P) lansa relatóriu Índise Presu Konsumidór (IPK) Marsu nian no hatudu katak inflasaun iha fulan ne’e sa’e 0,8% kompara ho Fevereiru 2025 iha de’it 0,1%.
Tuir dokumentu INETL, aumentu presu ne’e tanba hetan kontribuisaun husi grupu hahán no bebida la’os alkoólika 1,1%, alkoól no tabaku 0,5%, uma 1,3%, transporte 0,3% no ekipamentu no manutensaun mobiláriu uma-laran 0,2%.
Dadus INETL hatudu katak grupu hahán no bebida la’os alkoólika sa’e 1,1% tanba hetan impaktu maioria husi subgrupu modo-tahan 5,0%, foos 0,3%, paun no sereál 0,6%, mina no bokur 0,1% no produtu ai-han 0,2%.
Enkuantu subgrupu susubeen, keiju no manutolun tun 1,1%, masin-midar, marmelada, bani-been, xokolate no hahán midar tun 0,2%, ikan no hahán tasi 0,5%, no naan 0,3%, ne’ebé sai hanesan mudansa kontráriu ba inflasaun grupu hahán no bebida la’ós alkoólika.
Nota ne’e haktuir mudansa persentajen IPK anuál sa’e 0,8% kompara entre Marsu 2025 no Marsu 2024, tanba hetan kontribuisaun husi grupu hahán no bebida la’ós alkoólika sa’e 1,3%, edukasaun 0,4%, alkoól no tabaku 0,1%, ekipamentu no manutensaun mobiláriu uma-laran 0,5%, uma 0,7%, saúde 3,0% no hatais no sapatu 0,4% ba anuál Marsu 2025.
Nune’e ba grupu transporte tun 1,6%, no komunikasaun 0,9%, sai hanesan mudansa kontrariu ba inflasaun grupu hotu ba anuál Marsu 2025.
Notísia relevante: INETL konfirma inflasaun iha Fevereiru sa’e 0,1%
Jornalista: Arminda Fonseca
Editora: Maria Auxiliadora
