KOVALIMA, 28 Abríl 2025 (TATOLI) – Organizasaun Klibur Dezenvolvimentu Sustentavel Timoroan (KDESTO), munisípiu Kovalima, seidauk konsege implementa hotu Planu estratéjiku (PE) 2023-2027 ho atividade haat iha Kovalima.
Diretór KDESTO Kovalima, Alfredo dos Santos justifika, razaun seidauk konsege implementa hotu tanba hasoru difikuldade hanesan la iha kapasidade finanseira atu finansa atividade no la iha edifisiu própriu atu hala’o servisu.
“KDESTO la iha kapasidade finanseira no fatin atu akumula ema ho defisiénsia tanba haree ba rekursu umanu naton atu apoiu KDESTO; ami atu implementa atividade sira ne’ebé define ona,” Alfredo dos Santos, informa ba TATOLI, iha Bairru Kosta, ohin.
Iha PE 2023-2027, organizasaun ba ema ho defisiénsia ne’e iha progama lima maibé foin mak implementa ida mak hanesan asegura partisipasaun ema ho defisiénsia iha públiku (muda pensamentu públiku kona-ba direitu EhD) enkuantu sira seluk seidauk.
Dirijente KDESTO Kovalima ne’e informa katak planu sira ne’ebé mak seidauk konsege implementa mak hanesan asesu no partisipasaun EhD iha edukasaun formál ho la’ós formál, detesaun no prevensaun sedu ba EhD – labarik no joven, asegura EhD nia partisipasaun iha setór ekonomia hanesan kooperativa, agrikultura, negósiu, produsaun, peska no ortikultura.
Atividade seluk mak garante EhD nia partisipasaun iguál iha setór justisa, infraestrutura, komunikasaun no teknolojia ho asisténsia sosiál no seluktan ho garante atividade desportu hodi mellora saúde EhD.
Tan ne’e, iha 2025 ne’e, dezafiu ba organizasaun KDESTO atu implementa, ne’ebé daudaun ne’e iha hela faze prosesu tau matan ba ema ho defisiénsia (EhD) atu tuun ba to’o iha baze.
Organizasaun hetan apoiu husi doadór internasionál liuhusi PHD – fó apoiu ba ADTL kontinua apoiu ba nia membru sira hodi prienxe rekezitu, nune’e KDESTO hetan apoiu iha orsamentu rihun lima-resin.
Verba ne’e uza hodi hala’o konsolidasaun ba líder komunitária sira iha Postu administrativu Fohorem, ho destinu implementasaun mak iha suku sira hanesan Suku Fohorem, Dato Rua, Datolu Tolu no Suku Laktos ne’ebé implementa ona .
KDESTO mós iha hanoin hakarak fortifika liután tulun EhD sira atu labele ko’alia de’it. Nune’e, EhD sai hanesan objetu halo buat ne’ebé ho asaun; ne’ebé prátika atu bele dezenvolve portadór defisiente sira iha futuru.
Atu dezenvolve EhD, daudaun-ne’e, KDESTO halo hela konsultasaun ho Governu Japaun, liuhusi embaixada Japaun iha Timor-Leste, atu bele tulun organizasaun harii sentru formasaun ba EhD ho objetivu atu fasilita formasaun hotu.
“Sentru formasaun haree ba defisiénsia matan karik ita halo saida, hanesan sira presiza fasilita formasaun letra brailer espesifiku ba EhD matan oinsá, mak sira bele hakerek nune’e bele asesu ba teknolojia hanesan komputadór no telefone”, nia dehan.
Atu estabelese sentru formasaun iha munisípiu, presiza iha tan tradutór lian jestuál nune’e organizasaun halo konsultasaun ho parseiru sira atu fornese formasaun ba tradutór lian jestuál bele atende ho di’ak liu.
Notísia relevante:KDESTO Covalima fó prióridade implementa programa lima hodi fasilita EhD
Jornalista:Celestina Teles
Editór: Rafael Ximenes de A. Belo
