DILI, 30 Abríl 2025 (TATOLI)—Diretór Jerál Sekretaria Estadu Formasaun Profisionál no Empregu (SEFOPE), Carlito Rosario Cabral, hateten Ministériu Koordenadór ba Asuntu Ekonómiku (MCAE-sigla portugés) sei aprezenta hikas Ezbosu Lei Saláriu Mínimu bá iha Konsellu Ministru (KM) hodibele determina saláriu mínimu ba traballadór sira.
“MCAE halo ona rekonsultasaun kona-ba saláriu mínimu no iha ona prosesu atu lori filafali bá Konsellu Ministru,” Carlito Cabral dehan iha nia kna’ar fatin, Kaikoli, kuarta ne’e.
Nia informa, atu deside saláriu mínimu ne’e la’ós SEFOPE de’it, maibé baibain bolu Konsellu Nasionál Traballu ne’e kompostu husi SEFOPE, Câmara Comércio Indústria de Timor-Leste (CCI-TL) no Konfederasaun Sindikatu Timor-Leste (KSTL) mak deside.
“Desizaun ne’e la’ós túr-túr foti maibé bazeia ba peskiza ruma ba atividade moris ekonomia iha Timor foin bele deside saláriu mínimu ne’e hira. Se ita mantein ho saláriu mínimu $115 ne’e kapasidade ba hola sasán ne’e haree la to’o. Oinsá atu hamenus má-nutrisaun iha rai-laran, se ita labele hola buat di’ak ka ai-han di’ak ida ho saláriu ne’ebé ki’ik hanesan ne’e. Tanba ne’e mak ita deside atu saláriu mínimu ne’e bá $150,” nia afirma.
Nia haktuir, SEFOPE nia polítika ba iha traballadór doméstiku mós iha ona ezbosu no parte jurídiku halo ona pareser hodi halo sinkronizasaun no sei submete fali bá iha MCAE, depois sira (MCAE) mak sei lori bá Konsellu Ministru.
Notísia relevante: SEFOPE prepara Ezbosu Lei Traballadór Doméstiku
Entretantu, Prezidente KSTL, Almeiro Vila Nova, hateten KSTL espera iha tinan 2025 ne’e problema saláriu mínimu bele hetan ona solusaun, tanba tinan kotuk liubá bainhira hetan rejeisaun husi Konsellu Ministru, KSTL konvoka reuniaun ho SEFOPE, konvida mós husi parte Ministériu Finansa nian atu esklarese situasaun ekonomia, no mós enkontru ho Ministériu Asuntu Kombatente Libertasaun Nasionál ne’ebé rona ona hotu-hotu ninia hanoin.
Empreza konkorda saláriu mínimu $150
Iha parte seluk, Reprezentante Empreza Uma Asia Motorizada, Lda, Adriano de Jesus Barreto, konkorda ho saláriu mínimu $150 ba traballadór sira iha proposta foun Governu nian.
“Ami konkorda ho saláriu foun ne’ebé Governu propoin atu traballadór sira iha vontade atu serbisu no responsabilidade. Ha’u hanoin ida-ne’e di’ak ba traballadór sira. Ita laiha problema se Governu propoin saláriu mínimu $150,” Adriano de Jesus Barreto, dehan ba jornalista sira iha semináriu atribuisaun sertifikadu rekoñesimentu ba empreza sira iha Luz Clarita, iha Luz Clarita, Bairru Formosa, Dili, kuarta ne’e.
Tuir reprezentante ne’e, empreza ne’e kada fulan selu saláriu mínimu $135 ba ninia traballadór sira.
“Ami iha traballadór na’in-21 no sira kontribui ba seguransa sosiál, tanba sira serbisu iha ofisina (bengkel) no loja,” Adriano hateten.
Nia afirma, kestaun saláriu mínimu ne’e ne’e importante, tanba ne’e empreza sira tenke konsidera, nune’e funsionáriu sira bele kontente atu servisu.
“Ha’u sente orgullu bele simu sertifikadu rekoñesimentu husi Sekretaria Estadu Formasaun Profisionál no Empregu (SEFOPE). Rekoñesimentu ne’e motiva ami atu fó servisu ba traballadór sira ho di’ak. Funsionáriu no empreza tenke iha respeitu ba malu atu asegura fornese serbisu ne’ebé di’akliu,” nia afirma.
Aleinde ne’e, traballadór ida husi Empreza AquaFu, José Soares, konsidera katak saláriu mínimu fulan-fulan la sufisiente, tanba ne’e Governu ho setór privadu sira konkorda atu hasa’e saláriu mínimu bá $150, ne’ebé sei ajuda nia hadi’a nia moris.
Nune’e mós, traballadora ida iha Loja Meimart, Josefina Bakita da Silva, relata katak nia servisu iha empreza ne’e tinan rua ona no kada fulan simu $115.
“Ha’u hahú serbisu ho saláriu $115 no agora empreza hasa’e bá $120,” nia haktuir.
Tuir traballadora ne’e, saláriu mínimu atuál la to’o atu hatán ba nia nesesidade bázika loron-loron, tanba ne’e karik Governu hasa’e saláriu mínimu, nia agradese.
Jornalista: Natalino Costa
Editór: Xisto Freitas da Piedade
