DILI, 07 Maiu 2025 (TATOLI)–Embaixadór Timor-Leste ba Reinu-Kamboja, Hermenegildo Lopes “Kupa”, hateten dezenvolvimentu ekoonomia Kamboja bele sai ezemplu ba Timor-Leste tanba Kamboja nia ekonomia daudaun ne’e avansadu.
“Kamboja bele sai hanesan ezemplu ida ba Timor-Leste tanba muda ona husi situasaun pós-konflitu ba ekonomia ida-ne’ebé krexe lalais iha Sudeste Aziátiku,” Embaixadór ne’e hateten ba Agência Tatoli liuhusi programa “Entrevista Eskluziva” iha estúdiu Faról, tersa (06 Maiu 2025) ne’e.
Iha tempu badak, nia dehan, Timor-Leste nia intensaun mak hametin kooperasaun ho Kamboja iha setór agríkola, tanba aleinde konsidera hanesan ida-ne’ebé di’ak-liu iha seguransa alimentár iha rejiaun, esporta maioria husi nia produtu sira ba merkadu mundiál sira, hanesan Uniaun Europeia, Xina no Estadu Unidu Amérika.
“Tuir ha’u-nia haree, importante tebes atu ita aprende husi Kamboja hodi dezenvolve zona ekonómika espesiál no kria parke industriál atu nune’e bele hetan dezenvolvimentu ekonómiku ne’ebé sustentável,” nia sujere.
Diplomata ne’e realsa tan, Kamboja iha zona ekonómiku espesiál hamutuk 100-resin ne’ebé fó serbisu ba ema besik 30.000.
Tuir nia, karik Timor-Leste estabelese parke industriál ida, sei bele impulsiona makaas ekonomia nasionál, tanba medida ne’e sei permite atu zona ida-idak hetan reseita anuál entre dolár amerikanu millaun $2 to’o millaun $3.
Nia dehan, Embaixada Timor-Leste iha Kamboja ne’e mantén ona kontaktu ho Ezekutivu Kamboja nian no hein katak vizita husi prezidente Senadu husi Kamboja, Hun Sen, ba Timor-Leste, ne’ebé marka ona ba ohin sei permite aprofunda relasaun bilaterál sira.
Diplomata ne’e mós hein empreza Kamboja sira sei investe iha nasaun, liuliu iha kriasaun parke industriál sira, nune’e kria empregu ba timoroan sira.
Aleinde ne’e, nia hateten, Timor-Leste presiza aprende husi Kamboja kona-ba unidade nasionál no estabilidade Governu nian hodi garante dezenvolvimentu iha área oioin.
Iha nasaun Kamboja, partidu sira-ne’ebé ukun no opozisaun hamutuk nafatin hodi garante ekonomia ida-ne’ebé sustentável.
Jornalista : Hortencio Sanchez
Editór : Cancio Ximenes
