DILI, 07 Maiu 2025 (TATOLI)-Prezidente Senadu Reinu Kamboja, Hun Sen, ho delegasaun hamutuk 43 to’o iha Aeroportu Internasionál Nicolau Lobato Komoro, Dili, ho aviaun Kingdom of Cambodia, pur volta tuku 17h40.
Tuir observasaun Tatoli iha terrenu, bainhira to’o iha aeroportu, Vise Primeiru-Ministru, Ministru Koordenadór Asuntu Ekonómiku, Francisco Kalbuadi Lay, no Ministru Negósiu Estranjeiru no Kooperasaun, Bendito Freitas, bá hasoru direta Prezidente Senadu ho delegasaun iha eskada aviaun nian. Hafoin ne’e, kontinua simu direitamente husi Prezidente Repúblika (PR), José Ramos-Horta, Primeiru-Ministru (PM), Xanana Gusmão, inklui membru Governu sira.
Hafoin ida-ne’e tara-tais no entrega ai-funan ba Prezidente Senadu no simu mós ho dansa kultura hodi akompaña delegasaun sira ne’e bá to’o salaun Very Very Important Person (V-VIP) aeroportu nian hodi deskansa minutu balu.
Depoizde deskansa uitoan, Prezidente Senadu ho delegasaun hamutuk ho Prezidente José Ramos Horta, Primeiru-Ministru Xanana Gusmão, sai husi sala V-VIP. Delegasaun sira ne’e sa’e karreta ne’ebé Governu prepara ona no Prezidente Senadu Kamboja rasik sa’e karreta PR nian ne’ebé para ona iha sala V-VIP nia oin no tula direitamente husi Prezidente, akompaña mós husi Xefe Governu ne’ebé hamriik iha karreta nia kotuk hodi hiit-liman ba estudante sira ne’ebé hein no hamriik iha portaun aeroportu to’o estrada protokolu sira.
Situasaun iha terrenu kontroladu, tanba hetan seguransa másima husi Polísia Nasionál Timor-Leste (PNTL) no Forsa Defeza Timor-Leste (F-FDTL).
Bainhira Prezidente Senadu ho delegasaun sai husi aeroportu, tuir oráriu, bá liu deskansa iha Palm Spring Hotel, iha Fatuhada, no akompaña husi PNTL no F-FDTL
Durante estadia iha Timor-Leste, husi loron 07 to’o 09 Maiu 2025, Prezidente Senadu ho delegasaun sei partisipa iha atividade sira mak hanesan hala’o reuniaun ho Prezidente Repúblika, José Ramos-Horta, Primeiru-Ministru, Xanana Gusmão, no Prezidente Parlamentu Nasionál, Maria Fernanda Lay.
Hun Sen sei partisipa iha sesaun estraordinária iha Parlamentu Nasionál Timor-Leste ne’ebé sei hato’o palestra ho títulu “Lisaun sira hosi Hun Sen: Hosi Genosídiu no Pobreza ba to’o Liberdade no Prosperiedade” iha Palásiu Prezidensiál.
Eventu ida-ne’e sei partisipa husi membru Parlamentu Nasionál, funsionáriu governamentál, diplomata, estudante sira no reprezentante sosiedade sivíl.
Aleinde ne’e, Estadu Timor-Leste sei kondekora Samdech Techo Hun Sen ho Grande Kolár Órden Timor-Leste nian, nu’udar rekoñesimentu ba nia kontribuisaun signifikativa sira hodi apoia Timor-Leste iha dékada rua ikus, partikularmente iha nia perkursu adezaun Timor-Leste ba ASEAN.
Vizita Prezidente Senadu Kamboja, Hun Sen mai Repúblika Demokrátika Timor-Leste reflete kompromisu forte husi Kamboja ho avansu diplomasia parlamentár, fortalese relasaun bilaterál hodi kontriubui bá páz, seguransa, stabilidade no prosperiedade iha rejiaun no mós mundu.
Notísia relevante: Prezidente Reinu Kamboja sei hato’o mensajen ba PN
Jornalista: Arminda Fonseca
Editora: Maria Fonseca
