DILI, 19 Maiu 2025 (TATOLI)– Forum Organizasaun Naun Governamental Timor Leste (FONGTIL) rekomenda ba Governu atu investe iha setor produtivu, ne’ebe sai hanesan baze ba dezenvolvimentu ekonomia.
“Ami nia rekomendasaun tinan hirak ba kotuk, desde tinan sanolu liu ba, ami sempre rekomenda ba governu atu investe iha setor produtivu, ne’ebe sai hanesan baze ba dezenvolvimentu ekonomia. Nune’e mos tenki hadi’a ita nia sistema infrastrutura bazika sira, no tenki investe ona iha setor agrikultura, nomos investe ba ita nia setor saude, hodi bele reduz numeru mortalidade no fo kondisaun diak ba ita nia sidadaun,” hatete Dirétor FONGTIL, Valentim da Costa Pinto ba Tatoli.
Dirétor Valentim hatete iha setor edukasaun bele garante kualidade rekursu umanu ne’ebe diak liu no sei iha oportunidade bele dezenvolve rekursu naturais iha Timor ho diak liu tan.
“Iha fali setor marina hau hanoin ne’e diak liu tanba Timor-Leste hanesan ilha tasi boot liu rai maran, ne’ebe ha’u hanoin riku-soin sira barak liu ne’ebe tinan-tinan ema sempre mai naok riku soin tasi nian. Hau hanoin tempu ona tenki investe iha setor marina, nomos setor turismo,” nia dehan.
Nia mos rekoñese katak rekomendasaun ne’ebe fo hosi FONGTIL, iha balun mak iha ona mudansa maibe balun seidauk. Exemplu, orsamentu ba agrikultura nafatin menus no setor sira seluk tan .
“Hanesan mos iha setor eduksaun, no saude ne’ebe tuir ami nia hanoin persiza investe maka’as iha setor ida ne’e. Ita bele iha oportunidade dezenvolve diak liu tan iha setor sira seluk, mais setor eduksaun, no saude mos ita ladun iha mudansa boot,” hatete Valentim.
Nia mos husu ba Ministeriu Agrikultura tenki halo investimentu bo’ot ba setor ekonomia, turismu, inklui mos industria bo’ot no ki’ik. Ne’e duni iha posibilidade atu prevee investimentu ne’ebe los atu nune’e bele permite investor husi rai liur halo investimentu iha rai laran. Hodi nune’e bele halo mudansa ba dezenvolvimentu nasaun ne’e no redus numeru dezempregu ne’ebe kontinua sae iha nasaun ida ne’e,” nia komenta.
Jornalista : Mirandolina Barros Soares
Editora : Armandina Moniz
