DILI, 22 Maiu 2025 (TAOLI)–Mate nu’udár odamatan ida atu ba moris eterna. Mate ne’e serteza, maibé momentu no ninia maneira mate ne’e hanesan mistériu ida. Liras nakukun mate-nian, iha kuarta (21 Maiu 2025) kalan ne’e, falun rai Ermera hatuur aan iha abu-abu tristeza ida-nia laran—mout iha mistériu doloroza ida-nia laran.
Iha kalan ne’e, komunidade futeból iha munisípiu Ermera simu lia-rekadu ida katak Prezidente Asosiasaun Futeból Ermera (AFE), Lomelino Salsinha “Cafu”, termina ona nia jornada moris iha mundu ne’e tanba moras komplikadu.
Prezidente Autoridade Munisípiu Ermera, José Martinho dos Santos Soares, hateten maktoban Lomelino Salsinha “Cafu” mate tanba durante fulan neen (6) nia laran sofre moras komplikadu,
“Nia moras durante fulan-neen (6), moras derrepente de’it mak lori ba hala’o tratamentu saúde to’o iha Malázia maibé la rekupera, entaun nia mai kontinua konsumu ai-moruk tradisionál de’it iha uma, ikus hakotu nia peregrinasaun,” PAM Ermera ne’e hateten ba Agência TATOLI liuhusi WhatsApp, ohin.
José Martinho fó sasin katak, nu’udar ema-ne’ebé mak ativu iha kualker pozisaun, aleinde sai Prezidente AFE, nia mós harii organizasaun meritu patriota ba veteranu nia oan sira no sai hanesan mós eskritór livru ida kona-ba Xanana Gusmao, hetan inspirasaun husi nia aman ne’ebe uluk subar Xanana Gusmao no nia mós hanesan emorezáriu ida.
Aleinde ne’e, Diretór Departementu Dezenvolvimentu Asosiasaun Membru Federasaun Futeból Timo-Leste (FFTL), Eduardo Vicente de Fatima Soares, hateten FFTL lakon ema di’ak ida-ne’ebé mak durante ne’e dedika nia aan tomak ba futeból iha munisípiu Ermera.
“Ita sente triste bainhira simu novidade triste ida husi Munisípiu Ermera katak Prezidente Asosiasaun Futeból Ermera hakotu ona iis. Iha momentu ne’e kedan, Prezidente FTTL orienta kedan ami hamutuk ho Sekretáriu Jerál FFTL atu haree oinsá reprezentante ruma ba presta omenajen ba família matebian,” Eduardo hateten.
Nia dehan, durante ne’e FFTL halo kontaktu ativu hela ho maktoban Lomelino no iha kondisaun ne’ebé mak di’ak.
“Drante ne’e ita iha kontaktu hela ho matebian, maibé derepente ita rona nia hakotu ona iis. Maibé ita lahatene durante ne’e matebian mós kala sofre hela moras balun, maibé ida-ne’e ita entrega hotu ba Maromak, kala destinu mak hanesan ne’e ona,” nia tenik.
Ekipa dezloka ona ba Ermera presta omenajen, ino FFTL mós sei iha apoiu buat iruma la’o tuir kultura ita Timor nian atu ajuda ka halo kmaan família nia terus.
Kona-ba substituisaun ba matebian nia fatin hodi hala’o servisu nu’udar Prezidente AFE tuir estatutu Assosiasaun Munisípál nian hatete klaru ona katak bainhira iha aujente permanente ruma sei substitui husi Vise-Prezidente to’o realiza hikas kongresu hodi hili Prezidente foun.
Biografia badak
Matebian Lomelino Salsinha moris iha Nunutali, suku Humboe, postu administrativu Gleno, munisípiu Ermera, iha loron 28 fulan-Outubru 1975 no hakotu ona nia jornada moris iha loron 21 Maiu 2025.
Iha tempu okupasaun indonézia, matebian envolve aan iha futeból ne’ebé hanesan mós jogadór ho pozisaun defeza iha klube Café no iha tinan 2002 to’o 2004 kontinua sai jogadór iha klube Bulgaria.
Iha tinan 2006 to’o 2016, matebian mós asume responsablidade hanesan sekretáriu jerál ba klube Café.
Iha tinan 2016 to’o 2020 kontinua asume fali kna’ar sekretáriu jerál Asosisaun Futeból Munisípiu Ermera, no iha tinan 2020 nia eleitu ba prezidente Asosiasaun Futeból Ermera no nia re-elietu fila fali iha 2024 to’o mai iha minutu ida hakotu nia jornada moris ne’e, matebian asume hela kna’ar nu’udár Prezidente Asosisaun Futeból Ermera.
Obrigadu ba ita-boot nia kontribuisaun no dedikasaun ba dezenvolvimento futeból Timor-Leste. Adeus Cafu..!
Jornalista : Hortencio Sanchez
Editór : Cancio Ximenes
