DILI, 02 Maiu 2026 (TATOLI) – Asosiasaun Futsál Timor-Leste (AFTL) organiza Festivál Sentru Futsál Juveníl hodi apoia talentu foinsa’e sira-nian iha mundu desportivu iha kategoria Under (U-12 no U-14).
Festivál ne’e realiza ho tema prinsipál “The Future of Futsal Starts Here”, iha ne’ebé jogu referidu realiza iha salaun multifunsaun Bebora Dili, sesta loraik.
Eventu ne’e partisia husi klube hamutuk 12 ne’ebé fahe ba grupu haat (4) U-12 klube neen (6) no U-14 neen (6) mak hanesan:
Grupu A U-12 Habibie Santa-Ana U-12, Mushila Academy U-12 no Quintal Boot U-12. Grupu B, SFX U-12, Faról U-12 no Sport Dili e Benfica U-12. Enkuantu, Grupu A U-14 , Sport Dili e Benfica U-14, Faról U-14 no SFX U-14. Grupu B U-14, Habibie Santa-Ana U-14, Mushila Academy U-14, no Quintal Boot U-14.
Prezidente AFTL, Antoninho Jr. Guterres Ximenes, hateten jogu ne’e hanesan meiu ida hodi prepara futuru jogadór ne’ebé di’ak, la’ós liu de’it husi treinamentu maibé liu mós husi festivál.
“Fulan tolu liubá ami lansa Sentru Juveníl AFTL nian. Ami iha kompromosiu ida katak labarik sira ne’e la’ós treinu de’it, maibé ita halo festivál ba sira kada fulan tolu ou haat, ita hahú ohin to’o 10 Maiu mak finál”, prezidente ne’e dehan.
Nia argumenta katak festivál ne’e atu hasa’e mós jogadór juveníl sira-nia mentalidade no abilidade hodi prepara ba futuru. “Sira iha Sentru Juveníl só treinu, sira iha sparing, maibé ida-ne’e la to’o. Iha festivál ne’e atu hasa’e tan sira-nia koñesimentu no hadi’a sira-nia mentál tanba jogu jasoru bairru seluk ne’e sira-nia intensiade jogu ne’e sa’e maka’as”, nia realsa.
Jogu abertura ne’e, hahú ho ekipa rua hanesan, Mushila U-12 kontra Habibie Santa-Ana U-12.
Jornalista: Hortêncio Sanchez
Editora: Maria Auxiliadora
