DILI, 23 Maiu 2025 (TATOLI) – Embaixadór Timor-Leste ba Japaun, Ilídio Ximenes da Costa lori povu, Estadu, no governu Timor-Leste no nia aan rasik agradese no hato’o obrigadu ba povu no governu Japonés no JICA (Japan International Cooperation Agency).
Embaixadór hato’o tanba povu no governu Japonés no JICA nia kompromísiu umanu ne’ebé fó tulun ba povu, Estadu no Governu Timor-Leste liuhusi asisténsia téknika no finanseira iha área edukasaun/formasaun, saúde, infraestrutura, agrikultura, seguransa no defeza no iha área sosiál, ekonomia no sira seluk ne’ebé implementa liuhusi embaixada Japaun, JICA no parseiru dezenvolvimentu sira seluk iha Timor-Leste.
“Iha programa barak mak realiza ona iha période tinan-lima nia laran ne’e”, Embaisadór Timor-Leste ba Japaun, Ilídio Ximenes hato’o, iha komunikadu ne’ebé diriji ba TATOLI, ohin.
Diplomata ne’e hato’o susesu balun ne’ebé sai hanesan sasukat e indikadór: fó tulun materiál ba prevensaun kurativa moras COVID 19, hadi’a fasilidade agrikultura, bee-moos, no river wall protection – protesaun ba parede mota nian, ne’ebé hetan estragu husi dezastre naturál, fó tulun ekipamentu no materiál ba Ministériu saúde, protesaun sívil, Unidade Polisiamentu Marítima, fó tulun mós materiál pezadu hamutuk 26 ba Institutu Jestaun Ekipamentu (IGE). Tulun seluk mak hanesan kontrusaun ba aeroportu nasional Nicolau Lobato no hospital andar haat ba pediatria.
Nune’e mós, ba dahuluk iha istória de koperasaun bilaterál, Governu Japaun ho Governu Timor-Leste asina akordu (MOC) ba Programa Technical Intern Training (TIT) hodi haruka joven mai aprende no servisu iha Japaun. Kochi prefecture marka istória ba koperasaun programa TIT ne.
“Agradese tebes Seiji Hamada, governadór Kochi. Daudaun ne’e iha ona ema 31 mak serbisu iha área agrikultura, otelaria, konstrusaun sívil (pinta ró no solda ró) ne’ebé namkari iha prefecture Kochi, Hiroshima, Ibarakhi. Iha planu fulan-Jullu 2025 ne’e, TIT sira na’in-28 ne’ebé liu ona entrevista sei mai Japaun no sei ba serbisu iha Kochi, Hiroshima, Hokkaido, Ibarakhi no Miyagi,” embaixadór ne’e hateten.
Embaixadór Timor-Leste ba Japaun, Ilídio Ximenes da Costa hato’o, iha kreximentu ba númeru estudante simu bolsa estudu husi governu Japaun liuliu JICA/JICE/JDS no MEXT, NDA no balun selu rasik no instituisaun/organisasaun universidade mak selu. “Daudaun ne, iha estudentes hamutuk 45 iha Japaun”, nia informa.
Iha biban seluk, tuir embaixadór, ba dahuluk iha ona setór privadu no investór Japones balun ne’ebé hahú loke sira serbisu iha Timor Leste, hanesan: kompania Tsuneishi Shipbuilding, ITOCHU, INPEX, CWP/KANSEI no KENJA seluktan.
Entretantu, Embaixadór Japaun iha Timor-Leste, Ilídio Ximenes destaka iha Japaun iha fulan-Fevereiru 2020 no sei ramata nia misaun iha 30 Juñu 2025. “Ha’u iha ne’e tinan-lima fulan-neen. Durante tinan ne,e ita-nia relasaun diplomátika ho governu Japao la’o di’ak tebes”, nia rekoñese.
Jornalista: Argentina Cardoso
Editór: Rafael Ximenes de A. Belo
