MANATUTU, 24 Maiu 2025 (TATOLI) – Ministru Juventude, Desportu, Arte no Kultura (MJDAK), Nelyo Isaac Sarmento, hateten Governu sei inaugura estádiu munisipál Manatutu iha fulan-Juñu tinan ne’e.
Governante ne’e argumenta, Estádiu referidu empreza finaliza ona maibé hela buat balu sei presiza hadi’a hodi kompleta ba 100%.
Notisia relevante:Manán SLB Laulara, Karketu Dili rekolla pontu tolu ho golu mihis
“Estádiu ne’e, ita inaugura iha fulan-oin (fulan-Juñu), tanba intermus infraestrutura iha estádiu ne’e, iha buat balun seidauk kompletu, nune’e presiza atu kompleta tan”, Ministru Nelyo hateten iha Manatutu, sábadu ne’e.
Rekorda fali katak, Estádiu Manatutu hahú konstrusaun iha 2015, ne’ebé ka’er husi Kompaña Obrai Unipessoal Lda ho númeru kontratu ICB/0128/SEJD-2014, ho totál orsamentu $2.363.976,44, maibé iha 2022 Governu tenke aumenta tan adisionál osan hamutuk $184.741,35 ho kontratu fulan-ualu hahú husi fevereiru-setembru 2022.
Tanba ne’e, ho totál orsamentu ne’ebé gasta ba estádiu ne’e husi kontratu tuan no adisionál hamutuk $2.547.717,79.
Maibé durante prosesu konstrusaun empreza halo ladun másimu, nune’e iha tinan 2024, Governu liuhusi MJDAK tau fali konfiansa ba empreza Viqzum Unipesoál Lda, hodi troka empreza Obrai hodi finaliza Estádiu Munisípiu Manatutu.
Tanba ne’e, Governu kontrata fali kompaña foun Viqzum Unipesoál, Lda mak kontinua halo fali obra estádiu Manatuto to’o finaliza.
Governu kontrata fali empreza Viqzum hodi substitui kompaña anterior tanba na’in ba empreza hakotu ona pregrinasaun iha mundu ne’e. Nune’e Governu hakarak kompañia foun bele aselera lalais no bele finaliza fali konstrusaun referidu.
Tuir kontratu foun ne’ebé Governu halo ho kompañia ho osan restu ne’ebé sei iha no adisionál hamutuk $600.000 mak fó ba kompañia hodi kontinua obra ne’e.
Notisia relevante:Governu kontinua investe iha futeból hodi lori hakbesik ba munisípiu
Jornalista: Hortencio Sanchez
Editór: Florencio Miranda Ximenes
