DILI, 27 Maiu 2025 (TATOLI)-Fundu Dezenvolvimentu Kapitál Umanu (FDCH-sigla portugés), hahú prepara ona viza ba bolseiru admitidu nain-15 ne’ebé sei kontinua estudu iha Akademia Politéknika Enjeñaria Mekánika no Industriál (ATMI, sigla indonézia) Surakarta, Indonézia.
“Daudaun prepara sira nia viza estudante. Kuandu hotu bele aranka ona”, Diretór Ezekutivu FDCH, Júlio Aparício, dehan ba TATOLI via WhatsApp, ohin.
Nia dehan bolseiru sira-ne’e foti área estudu sira hanesan enjeñaria manufaktura, mekánika no enjeñaría industriál ho nível estudu diploma IV.
Totál bolseiru ne’ebé ezistente to’o 2024 ne’e hamutuk 4.830 ho nia totál osan $13.956.821. Hosi númeru 4.830 ne’e inklui ho bolsa parsiál sira.
FDCH nia proposta orsamentu ba tinan 2025 hamutuk $18.973.544, ne’ebé mak sei finansia ba atividade 51, iha programa prinsipál haat mak hanesan formasaun profisionál ho nia orsamentu $1.223.780 ne’ebé sei finansia atividade tolu, formasaun téknika ho nia orsamentu $2.051.682 sei finansia atividade 16, bolsa estudu ho nia orsamentu $13.956.821 sei finansia ba atividade 30 no funsionamentu no dezenvolvimentu institusionál ho nia orsamentu $1.741.261 sei finansia ba atividade rua.
Notísia relevante: FDCH sei oferese bolsa lisensiatura ba ema-374
Jornalista : Osória Marques
Editora : Rita Almeida
