DILI, 02 Juñu 2025 (TATOLI)–Prezidente Repúblika liuhusi Diresaun Servisu Palásiu Prezidensiál no Diresaun Servisu Sosiedade Sivil no Asuntu Sosiál halo lansamentu ba primeira pedra uma dignu ba família vulneravel ida naran Luciano ho nia espoza Regina Soares ho oan feto Leliana Perreira iha suku Makili, aldeia Maulako, postu admistrativu Ataúru, munisipiu Ataúru.
Assesór Diresaun Servisu Sosiál no Asuntu Sosiál, Quintiliano Moniz Carvalho, hateten objetivu ba lansamentu uma ne’e tanba iha momentu balun nia rasik ho ekipa mak observa kondisaun uma ne’ebé familia kiik ne’e hela ba ne’e, laiha duni kondisaun atu horik ba.
Oh kondisaun ida-ne’e, xefe suku Makili halo karta proposta hodi haruka ba Prezidente Repúblika, José Ramos Horta, hodi prosesa no hetan duni solusaun no halo lansamentu ba uma referidu.
”Ohin, halo de’it lansamentu ba primeira pedra ne’ebé akompaña husi Prezidente Autoridade Ataúru no autoridade lokal no familia vurleravel sira, nune’e ita entrega ba Autoridade Munisipiu no suku sira atu akompaiña prosesu konstrusaun uma ne’e to’o durasaun fulan-tolu (3) bele finaliza ona,” Quintiliano hateten liuhusi nota ne’ebé Agência TATOLI asesu, ohin.
Nia hateten, apoiu hirak ne’e inisiativa husi Prezidente Republika José Ramos Horta nian atu fahe domin ba família ema ho defisiénsia no vulneravel sira-ne’ebé presiza tulun.
Uma ne’ebé halo ona lansamentu ho medida 8×7 ne’ebé kompletu ho haris fatin, dapur, kioske, ne’ebé ninia durasaun ba kontrusaun uma ne’e durante fulan tolu nia laran.
Hafoin lansamentu ba uma ne’e, Familia Vulneravel Luis Pereira ho Espoza Regina Perreira hato’o obrigadu ba Prezidente Repúblika José Ramos Horta ne’ebé ajuda ona sira hodi konstrui uma dignu ida ba sira hodi hela.
“Ami láiha tan liafuan seluk atu ko’alia. Ami fó de’it obrigadu ba Prezidente Republika ne’ebé laran di’ak tebes,” Luis Pereira hateten.
Apoiu ne’ebé Prezidente Repúblika fó ba família Vurneravel sira mai husi orsamentu Presidénsia Repúblika nian, maibé mai mós husi Prezidente nia kolegassira namkari iha mundu hanesan Japaun, Korea, Austrália, Honkong, no balun husi Prezidente niniaa vensimentu fulan nian.
Jornalista : Hortencios Sanchez
Editór : Cancio Ximenes
