KOVALIMA, 09 Juñu 2025(TATOLI) –Prezidente Tribunál Rekursu, Afonso Carmona, hamutuk ho Membru konsellu, segunda-ne’e, hala’o reuniaun ho juís, ofisiál justisa sira iha Tribunál Primeira Instánsia Munisípiu Kovalima atu enkoraja juís sira hala’o julgamentu kazu kumpri oráriu julgamentu.
“Presiza motiva juís sira nune’e sira hanoin mak atu hala’o servisu de’it hanesan funsionáriu públiku. Ita presiza suporta sira katak servisu mak importante la’ós hanoin atu muda. Bainhira muda tanba iha kapasidade halo promosaun. Juís sira presta servisu hala’o julgamentu ba kazu sira tuir oráriu julgamentu ne’ebé iha sira tenke kumpri”, Prezidente Tribunál Rekursu, Afonso Carmona, informa ba jornalista sira iha Tribunál Munisípiu Kovalima, ohin.
PTR dehan, presiza motiva juís sira saida mak juís sira deside hanesan marka loron atu halo julgamentu hanesan tuku 08:00 halo julgamentu, entaun-sira tenke kumpri no juís-sira labele mai fali tuku 10:00 entaun la kumpri ona regra.
Ho nune’e kada tinan PTR sei hala’o avaliasaun servisu nune’e iha prosesu avaliasaun bainhira juís hala’o servisu ho di’ak motiva juís bele atribui sertifikadu ka prezente sira seluk atu labele buka sira-nia problema, maibé avalia servisu hodi buka solusaun presiza haree ba regra.
Iha biban ne’e, PTR dehan, nia prezensa hodi hala’o vizita mai iha Tribunál Primeira Instánsia Kovalima hanesan parte ida hodi kumpri nia promesa bainhira simu pose husi Prezidente Repúblika iha loron 29 Abríl tinan ne’e.
“Dezde ha’u hetan nomeasaun sai prezidente Tribunál Rekursu, molok ne’e ha’u hanoin ona atu dezenvolve setór justisa iha Tribunál. Ho nune’e ha’u deside vizita Tribunál Primeira instánsia Suai no mós sei vizita tan sira seluk”, nia informa.
PTR hala’o vizita Tribunál Primeira Instánsia Suai hamutuk ho konsellu ho intensaun oinsá atu hala’o reuniaun ho ofisiál justisa no funsionáriu sira iha Tribunál hodi rona direta sira-nia lamentasaun no saida mak presiza atu apoia nune’e Tribunál bele funsiona ho di’ak, Juís ho ofisiál justisa sira bele servisu ho di’ak.
Ho prezensa PTR ho nia membru konsellu atu hala’o reuniaun, nune’e juís, ofisiál justisa sira atu aprezenta sira-nia preokupasaun durante ne’e sira enfrenta nune’e sira bele envolve iha prosesu ho kontente.
Tuir loloos reuniaun konsellu hala’o iha Dili maibé PTR hakarak lori servisu iha Dili lori mai iha munisípiu atu rona preokupasaun juís, ofisiál justisa ho funsionáriu sira ho hanoin la’ós lori tribunál movél hakbesik ba povu, maibé PTR mak hakarak reuniaun konsellu hakbesik mai iha Tribunál iha munisípiu sira tanba juís sira mak hala’o servisu iha baze nune’e bele motiva sira.
Iha sorin seluk, Juís Administradór Tribunál Primeiru Instánsia Munisípiu Kovalima, Naasson Sarmento sente orgullu tanba Prezidente Tribunál Rekursu ho membru Konsellu hala’o vizita ba dahuluk mai iha Tribunál Primeira Instánsia Kovalima.
“Juís administradór orgullu tanba hafoin Prezidente Tribunál rekursu simu pose deside hodi hala’o vizita ba dahuluk mai iha Tribunál Judisiál Primeira Instánsia Suai nune’e ami bele relata ami-nia preokupasaun sira durante ami enfrenta”, nia reforsa.
Tribunál Judisiál Primeira Instánsia Kovalima iha mós frakeza, iha biban ne’e, presiza atu hato’o mak falta rekursu, apoiu administrasaun, finansa no lojístika no fasilita formasaun ba juís no ofisiál justisa no mós halo promosaun karreira juís sira.
Juís administradór Suai iha esperansa ho mandatu Prezidente Tribunál Rekursu ho membru Konsellu sira halo esforsu nune’e bele halo mudansa iha Tribunál hodi halo dezenvolvimentu ba iha futuru no dezenvolve rekursu liliu ba iha bein-estar funsionáriu sira.
Tuir dadus funsionáriu ne’ebé servisu iha Tribunál Judisiál Primeira Instánsia Suai hamutuk 43,Ofisiál justisa 23, funsionáriu administrativu 15. Husi númeru ne’e, na’in-hitu permanente no na’in-ualu kontratadu, ofisiál lojístika na’in-rua, motorista na’in-rua no juís na’in-lima.
Jornalista: Celestina Teles
Editór : Rafael Ximenes de A. Belo
