KOVALIMA, 10 Juñu 2025 (TATOLI) – Sekretariadu Tékniku Administrasaun Eleitorál (STAE), Munisípiu Kovalima, seidauk bele halo atendementu ba sidadaun sira hakarak atualiza kartaun Eleitorál Biométriku iha postu administrativu hitu ne’ebé pertense ba munisípiu Kovalima.
Diretór STAE munisípiu Kovalima, Francisco Gusmão informa, STAE Kovalima seidauk bele halo atendementu hodi atualiza kartaun eleitorál biométriku iha postu administrativu Fatululik, Fatumea, Fohorem, Tilomar, Maukatar, Suai no postu administrativu Zumalai , tanba seidauk iha orsamentu.
“Programa atu halo atendementu eleitór sira atualiza kartaun eleitorál biométriku ita hala’o hela, maibé seidauk implementa iha postu administratrativu tanba seidauk kustu definitivu ba munisípiu” Dirijente STAE Kovalima, Francisco Gusmão, dehan ba jornalista sira, iha nia servisu fatin, Kampung Baru, ohin.
Autoridade másima STAE Kovalima ne’e dehan, STAE Kovalima iha ona orsamentu foin bele estabelese postu resensiamentu iha postu administrativu hodi fasilita sidadaun sira atu atualiza sira-nia kartaun eleitorál ho sistema biométriku.
“Ita hein de’it bainhira iha ona orsamentu husi nasionál koloka mai iha iha Kovalima, ita foin bele halo atendementu sidadaun-sira iha postu administrativu hitu munisípiu Kovalima hodi estabelese postu resensiatementu iha postu administrativu halo atendementu ba sidadaun sira bele atualiza sira-nia kartaun eleitorál biométriku”, nia dehan.
Iha sorin seluk, Sidadaun Fernando Amaral reforsa katak STAE presiza estabelese postu resensiamentu iha postu administrativu sira hodi fasilidade sidadaun sira atualiza sira-nia kartaun eleitorál biométriku.
“Ita hatene postu administrativu sira dook husi kapitál munisípiu nune’e sidadaun barak iha postu administrativu seidauk atualiza kartaun eleitorál nune’e presiza estabelese postu resensiamentu iha postu administrativu”, nia rekomenda.
Ho nune’e sidadaun ne’ebé kompleta ona idade 17 no sidadaun sira iha postu maioria mak seidauk atualiza kataun eleitorál ne’ebé ho sistema biométriku nune’e sira nafatin uza kartaun eleitorál anteriór.
Fó hanoin fali katak, loron 30 Outobru 2024 ne’e, Sekretáriu Estadu Dezenvolvimentu Lokál Mateus dos Santos Tallo hahú lansa rezensiamentu eleitorál hodi atualiza baze dadus ho sistema biométriku iha Kovalima.
Jornalista:Celestina Teles
Editór: Rafael Ximenes de A. Belo
