DILI, 10 Juñu 2025 (TATOLI)—Komandu Polísia Nasionál Timor-Leste (PNTL) liuhosi Diresaun Tránzitu Seguransa Rodoviária (DTSR) ho Empreza Heineken iha Timor-Leste asina nota kooperasaun hodi halo estensaun ba programa “Timoroan hemu tua ho responsabilidade” ba tinan rua (2025-2027).
Molok ne’e, Diresaun Tránzitu Seguransa Rodoviária estabelese ona ho Empreza Heineken iha tinan 2023 hodi halo sosializasaun ba estudante no motorista sira atu konsume tua ho responsabilidade.
Diretór Tránzitu Seguransa Rodoviária (DTSR), Superintendente Asistente Luís da Costa hateten akordu servisu ne’e importante nune’e bá-oin autoridade seguransa tránzitu ho Empreza Heineken sei servisu hamutuk halo sosializasaun ba estudante no kondutór sira kona-ba hemu tua ho resposabilidade hodi salva vida.
“Ita-nia sidadaun sira dalabarak hemu hodi kondús transporte la kontrola aan no hetan asidente barak liu,” Luís da Costa hateten ba jornalista sira hafoin asina nota kooperasaun ho Empreza Heineken iha nia kna’ar fatin, Kaikoli, tersa ne’e.
Iha fatin hanesan, Diretór Empreza Heineken iha Timor-Leste, Komang Satria Wibawa, agradese ba PNTL tanba Heineken ho Diresaun Tránzitu Seguransa Rodoviária asina akordu kooperasaun durante tinan rua ba programa sensibilizasaun hemu tua ho responsabilidade ba komunidade liuliu estudante sira no kondutór.
“Ha’u kontente tebes ohin ami bele estende tan ami-nia kooperasaun durante ne’e, tanba PNTL nia responsabilidade boot tebes, oinsá atu asegura nia komunidade hodi hemu tua ho responsabilidade,” nia tenik.
Jornalista: Natalino Costa
Editór: Xisto Freitas da Piedade
