DILI, 25 Juñu 2025 (TATOLI)–Ekipa jogadór futeból hosi membru Polísia Nasionál Timor-Leste hamutuk na’in-30 sei partisipa iha jogu ASEAN Police (ASEANPOL) iha loron 4-20 Jullu 2025, iha Vietname.
Ekipa referida kompostu husi membru Polísia Nasionál Timor-Leste na’in-24 no sivíl iha ema na’in-neen. Ekipa ne’e sei aranka iha loron 2 Jullu 2025.
ASEANPOL nu’udár enkontru anuál entre Xefe Polísia sira iha nasaun Sudeste Aziátiku ne’ebé partisipa husi Xefe Polísia iha ASEAN, nasaun sira nu’udár observadór ba ASEAN no mós nasaun ne’ebé konsiderada parseira ho ASEANPOL. Enkontru ASEANPOL ne’e kada tinan hala’o iha Vietname. Jogu ne’e nasaun ualu mak sei partisipa.
Komandante Administrasaun Komandu Jerál PNTL, Superintendente Xefe Polísia Natércia Martins, hateten membru PNTL sira-ne’ebé iha Komandu Jerál hetan xamada husi Komandante Jerál no Segundu Komandante Jerál PNTL hodi halo enkontru kona-ba preparativu ekipa jogadór sira husi PNTL ne’ebé atu partisipa jogu iha Vietname.
“Ita kumpre konvite jogu preparasaun ASEANPOL ninian hodi harame enkontru anuál ASEANPOL. Ita prepara ita-nia jogadór kompostu husi jogadór sira PNTL, ema sivíl no mós ofisiál sira,” Natércia hateten ba jornalista sira iha Kuartél Jerál PNTL, Kaikoli, kuarta ne’e.
Nia dehan, jogadór sira Polísia Nasionál Timor-Leste ne’ebé mak sei partisipa iha jogu ASEANPOL ne’e maihusi jogadór PNTL ne’ebé dadaun partisipa iha Tasa Avó Nana.
“ASEANPol ne’e la’o kle’ur tiha ona. Kada tinan sei lori hamutuk Xefe Polísia sira husi nasaun ASEAN nian, nasaun ne’ebé mak sai hanesan parseiru ba ASEANPOL rasik no nasaun ne’ebé observadór hanesan Timor-Leste hodi hala’o enkontru. Agora sira loke eventu jogu iha ámbitu enkontru Xefe Polísia ASEAN ninian ba tinan ne’e,” nia haktuir.
Iha fatin hanesan, Treinadór Selesaun Jogadór Komandu PNTL, Inspetór Polísia Rosário Pereira, informa katak jogadór Komandu PNTL preparadu iha mentál no fíziku atu partisipa jogu ASEANPOL iha Vietname.
Nia esplika, iha jogu ne’e, Timor-Leste sei pool hamutuk ho uma-na’in Vietname, Singapura no Austrália. Enkuantu, xefe ekipa delegasaun mak Inspetór Xefe Polísia Domingos Ximenes.
Jornalista: Natalino Costa
Editór: Xisto Freitas da Piedade
