DILI, 01 Jullu 2025 (TATOLI)—Prezidente Rádiu Telivizaun Timor-Leste, Empreza Públika (RTTL, E.P), Elizeu Isaac, tersa ne’e, hamutuk ho estrutura hasoru malu ho Prezidente Repúblika, José Ramos Horta, hodi relata progresu servisu durante ne’e, iha Palásiu Prezidensiál Nicolau Lobato, Bairru Pite, Dili.
“Ohin, ami hasoru Prezidente Repúblika, hanesan aprejenta-aan tanba ami simu pose iha fulan-Marsu liuba seidauk hasoru Prezidente Repúblika, iha biban ne’e ami hato’o mós mudansa balun iha RTTL ba Prezidente Repúblika liuliu programa sira no konstrusaun edifisiu foun RTTL nian,” Elizeu Isaac hateten ba jornalista sira hafoin ramata enkontru.
Nia dehan, programa lubuk ida mak RTTL hala’o maibé iha programa rua mak importante liu tanba lansa direta husi Prezidente Repúblika.
“Ita informa programa hotu RTTL nian ba Xefe Estadu, katak programa sira la’o ho di’ak liuliu programa rua ne’ebé Prezidente mak lansa hanesan Horta Show no Diplomasia. Prezidente apresia tebes husu ami konta nia nafatin ba programa sira-ne’e no hatudu nafatin servisu ne’ebé di’ak,” nia dehan.
Entretantu, kona-ba konstrusaun ba edifisiu RTTL, nia dhean, la’o normál hela hanesan baibain no la’o ho di’ak.
“Konstrusaun ba edifisiu RTTL la’o normál hela maibé iha duni informasaun balun sai maibé ita konsidera ne’e normal. Tanba, edifisiu RTTL nian ne’e liuhusi reuniaun Board kada semana ami hala’o hela noeinvolve Ministériu Obra Públika, tékniku sira, konsultan sira no empreza ne’ebé kaer obra ne’e. Servisu hotu la’o hela tanba iha Kaikoli ne’e rai dodok uitoan ne’ebé buat ne’ebé ita hanoin la hanesan ho rezultadu teste ba rai ne’ebé fó sai la tuir saida mak UNDP nia hakarak. Entaun, tenke buka mekanizmu seluk, tanba doadór sira hakarak halo sasán mai ita ne’e ho kualidade,” nia dehan.
Jornalista : Hortencio Sanchez
Editor : Cancio Ximenes
