OEKUSI, 03 Jullu 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato, akompaña husi Diresaun Rejionál Infraestrutura (DRI), observa progresu fíziku ba projetu Kapela Santa-Reliki Citrana, ne’ebé lokaliza iha suku Bene-Ufe sub-rejiaun Nítibe, atinje ona 32%.
Hafoin observa, Rogério Lobato, enkoraja empreza konstrutora atu aselera projetu referidu no kumpre termu kontratu hodi finaliza tuir tempu ne’ebé termina ona iha kontratu.
“Ohin ha’u mai observa, ita haree nia progresu foin 32% hanesan ne’e. Ne’ebé, ohin ha’u rekomenda atu halais projetu ne’e tanba kapela ne’e nu’udar projetu emerjénsia, ne’ebé deside no aprova husi Konsellu Administrasaun Fundu Infraestrutura (KAFI) datoluk nian, ne’ebé Autoridade halo kapela ne’e, tanba konsidera hanesan turizmu relijioza ida iha Oekusi, ne’ebé eziste dezde tempu koloniál to’o ohin, entaun presiza hadi’a atu fó matak-malirin mai ita,” nia hateten iha suku Bene-Ufe.
Notísia relevante:Ekipa DRI Oekusi foti ona amostra rai hodi konstrui kapela Santa Reliqui Citrana
Iha fatin hanesan, Jestór sub-rejiaun Nítibe, Agustinho Afulit, agradese tanba Autoridade RAEOA dignifika kapela Santa Reliki hanesan fatin turizmu relijiozu ida iha sub-rejiaun Nítibe.
“Ami sente kontente tanba kapela ne’e nu’udar mós sitiu turístiku relijiaun ida iha sub-rejiaun Nítibe ne’ebé eziste tempu Portugés to’o ohin loron, ne’ebé agradese ba Autoridade RAEOA tanba tinan ne’e konsidera ami-nia proposta hodi aprova atu harii kapela ne’e ho uma fatuk tanba durante ne’e ho kondisaun uma tali de’it,” nia orgullu.
Notísia relevante:KAFI Oekusi aprova empreza tolu reabilita estrada kilometru 23 liu
Entretantu, projetu ne’e ezekuta husi empreza Relicitra Unipesoál Lda ho valór kontratu $132,179.27 ho durasaun kontratu durante fulan neen.
Jornalista: Abílio Elo Nini
Editór: Rafael Ximenes de A. Belo
