OEKUSI, 14 Marsu 2025 (TATOLI) – Ekipa tékniku husi Diresaun Rejionál Infraestrutura (DRI) foti ona amostra (sampel) estatutu rai hodi hala’o teste nia kualidade, molok konstrui edifisíu Santa Reliqui Citrana, ne’ebé lokaliza iha aldeia Citrana suku Bene-Ufe, sub-rejiaun Nítibe, Rejiaun Administrativa Espesiál Oekusi Ambeno (RAEOA).
Diretór Diresaun Rejionál Infraestrutura, Remigío Nuno Sila, informa, objetivu foti amostra ba rai ne’e atu hatene uluk kondisaun rai tanba harii obra ida presiza mós kualidade.
Notísia relevante:KAFI Oekusi aprova projetu emerjénsia 26 ho kustu millaun $36-resin
“Ohin, Diresaun Rejionál Infraestrutura hamutuk ho ekipa laboratóriu mai foti amostra rai atu hatene rai nia kondisaun, antes konstrui konstrusaun kapela ne’e no mós rekolla hela mós ho dadus balun liga kompañia nia servisu liuliu vizita terrenu no kompañia nia preparasaun,” nia dehan iha Oekusi, ohin.
Daudaun ne’e, nia informa preparasaun husi kompañia garantidu tanba mobiliza ona materiál konstrusaun sira no halo ona limpeza hamutuk ho sarani sira iha Citrana, tan ne’e mak daudaun ne’e tau ona estaka.
Kona-ba selebrasaun kontratu, nia afirma Autoridade seidauk realiza tanba kompañia foin hetan orden servisu, nu’udar projetu emerjénsia ne’ebé antes ne’e hetan ona aprovasaun husi Konsellu Administrasaun Fundu Infraestrutura datoluk.
“Orden servisu ne’e signifika husi kompañia sira bele komesa mobiliza ona materiál, ekipamentu ba fatin projetu no mós prepara fatin tau materiál sira,” nia hateten.
iha fatin hanesan, Jestór sub-rejiaun Nítibe, Agustinho Afulit, agradese tanba Autoridade RAEOA dignifika kapela Santa Reliqui hanesan fatin turizmu relijiozu ida iha sub-rejiaun Nítibe.
“Ami sente kontente tanba kapela ne’e nu’udar mós sitiu turístiku relijiaun ida iha sub-rejiaun Nítibe ne’ebé eziste tempu Portugés to’o ohin loron, ne’ebé agradese ba Autoridade RAEOA tanba tinan ne’e konsidera ami-nia proposta hodi aprova atu harii kapela ne’e ho uma fatuk tanba durante ne’e ho kondisaun uma tali,” nia orgullu.
Entretantu, konstrusaun kapela Santa Reliqui Citrana, sei ezekuta husi kompañia Relicitra Unipesoál Lda, kona-ba valór kontratu Autoridade RAEOA seidauk realiza tanba sei hetan verifikasaun husi Ajénsi Dezenvolvimentu Nasionál (ADN).
Dokumentu ne’ebé Ajénsia Tatoli,I.P asesu iha Diresaun Rejionál Infraestrutura (DRI) katak, Konsellu Administrasaun Fundu Infraestrutura (KAFI), Rejiaun Administrativa Espesiál Oekusi Ambeno (RAEOA), aprova ona projetu emerjénsia 26 ho kustu millaun $36-resin ($36,928,720.47) ne’ebé aloka mai husi fundu infraestrutra nasionál atu ezekuta iha tinan ne’e.
Notísia relevante:Konferénsia rejionál iha Oé-Cusse aborda futuru dezenvolvimentu turizmu relijiozu
Jornalista: Abílio Elo Nini
Editór: Florencio Miranda Ximenes
