DILI, 07 Jullu 2025 (TATOLI)–Fundu Dezenvolvimentu Kapitál Umanu (FDCH, sigla portugés) prepara ona kustu $900.000 ba implementasaun programa bolsa méritu ba timoroan.
Bolsa méritu hanesan bolsa Estudu ne’ebé oferese ba dosente husi universidade privada no funsionariu publiku sira bazeia ba sistema méritu. Bolsas estudu oferese husi instituisaun sira ne’ebé maka inskrita ona iha FDCH no hetan apoiu finanseiru husi instituisaun ne’e.
“Orsamentu ba bolseiru bolsa méritu ne’e hamutuk $850.000 to’o $900.000. Sira sei bá halo estudu iha Brazíl no Portugal tanba universidade privadu sira labele ba iha fatin seluk, tanba atu mellora lingua portugueza, entaun tenke ba iha nasaun rua ne’e,” Diretór Ezekutivu FDCH, Júlio Aparício, informa ba Agência TATOLI iha salaun Delta Nova, Segunda ne’e.
FDCH koloka bolseiru hamutuk 24 ba área saúde liuhusi Ministériu saúde (MS) iha tinan 2025.
“Ami fó fiar ba Ministeriu Saúde mak organiza, sira mak halo prosesu iha ne’ebá, ba espesialista sira,” nia akresenta.
Notísia relevante : 2024: IX Governu Konstitusionál la implementa programa bolsa méritu
Nune’e mós, ba Administrasaun Navegasaun Aérea Timor-Leste Empreza Públika, Empreza Públika (ANATL, E.P) iha ema na’in-20 ba áea aviasaun.
“Ita prepara iha tinan kotuk haruka ona na’in-35, agora aumenta tan. Tanba ita atu loke área Aeroportu iha Suai, Oekusi no Dili, presiza ema iha área ida-ne’e,” nia tenik.
Aleinde ne’e, Autoridade Portuáriu Timor-Leste, Institutu Públiku, Institutu Públiku (APORTIL, I.P) ba área mariña iha na’in-ualu no Sekretaria Estadu Arte no Kultura (SEAK) iha na’in-neen, ne’ebé sei serbisu hamutuk ho Institutu Arte Indonézia iha Jakarta atu haruka iha arte kultura.
Iha área agrikultura iha na’in-22 sei haruka bá Brazíl no Ministériu Ensinu Superiór Siénsia no Kultura (MESSK), liuliu ba universidade privadu presiza ema na’in-15
Jornalista : Osória Marques
Editora : Julia Chatarina
