DILI, 24 Jullu 2025 (TATOLI) – Jogu finál voleiból mistu entre Timor-Leste no Portugál remata ona ohin no iha kompetisaun ne’e fó vitória ba ekipa portugés, ne’ebé manán uma-na’in ho set rua iha Jogu Desportivu Komunidade País Ko’alia Lian Portugés (CPLP) Edisaun da-12.
Iha jogu ne’e, ekipa Portugál reprezenta husi Luís Filipe (2) no Matilde Silva (1) no Timor-Leste husi Noeh Deo Gracias (2) no Miguelia Pereira Ximenes (1).
Jogu entre ekipa mista timoroan no portugeza ne’e la’o di’ak iha inísiu, tanba idaidak halo defeza di’ak hodi simu bola ne’ebé remata ka spike husi kada atleta, ne’ebé halo adeptu sira hakilar bainhira jogadór ida la konsege simu bola ho di’ak.
Haree ba kompetisaun ne’e la’o, dupla portugés komesa hatudu ona sira-nia passing bola ba malu ne’ebé di’ak no remata bola ne’ebé maka’as halo Timor-Leste lakon pontu.
Nune’e, iha jogu primeira parte ne’e Timor-Leste lakon tanba falla mós iha service bola no pasa bola ne’ebé out, nune’e Portugál manán ho 21 no uma-na’in hela ho pontu 12.
Iha segunda parte nian, jogu komesa ho intensidade. Timor-Leste hetan difikuldade iha remata bola, enkuantu Portugál ho lalais aumenta vantajen, marka pontu ba lima, no husik Timor-Leste ho pontu 1. Durante iha faze ne’e, jogadór timoroan ida, Noeh Deo Gracias, sofre kaimbra, ne’ebé lori interrupasaun iha jogu durante minutu lima até rekuperasaun.
Ekipa rua komesa ataka malu ho remata bola. Maibé defeza Portugál metin hodi simu bola ho di’ak. Nune’e Timor-Leste lakon iha pontu atu duni Portugál, tanba tipu no spike ne’ebé halo husi dupla portugés.
Ekipa rua kontinua ataka malu liuhusi remata bola, maibé defeza husi parte Portugál ne’e sólida tebes, konsege asegura bola bainhira Timor-Leste remata. Maski Timor-Leste esforsu atu hasa’e pontu maibé spikes no jogadas husi dupla portugés ne’e determinante tebes.
Nune’e, ekipa mista Portugál garante vitória iha segundu set ho pontu 21, enserra jogu liuhusi service bola husi jogadora Matilde ne’ebé atleta sira husi Timor-Leste la konsege simu. Rezultadu finál ho pontu 21-16 ba ekipa mista Portugál.
Hafoin jogu, atleta Noeh Deo Gracias, husu deskulpa ba públiku tanba la konsege manán medalla osan-mean ba Timor-Leste.
“Ami esforsu duni maibé labele manán Portugál, tanba sira ekipa ne’ebé forte tebes. Maibé ho jogu sira durante ne’e sai esperiénsia ba ami. Iha oportunidade jogu internasionál ami bele aprezenta fali Timor-Leste nia naran hodi kompete iha jogu tuirmai”, dehan iha kampu Lesidere, ohin.
Iha fatin hanesan, jogadór husi Portugál, Luís Filipe, espresa sentimentu kontente liuhusi matan-been. Ba nia, rezultadu ohin ne’e halo sira satifás tanba durante ne’e sira treinu, sempre serbisu ho ekipa.
“Ami kontente tebes tanba bele manán no rezultadu ohin ne’e ami lori ba ami-nia família no nasaun, liuliu ha’u-nia pai no mãe ne’ebé sempre apoia ha’u”, dehan.
Atleta Matilde Silva salienta rezultadu ohin ne’e valór tebes ba sira, tanba jogu ne’e reprezenta nasaun. “Orgullu tebes tanba bele manán medalla osan-mean”, nia konklui.
Notísia relevante: Finál voleiból praia mistu: Timor-Leste kontra Portugál aban
Jonalista: Arminda Fonseca
Editora: Maria Auxiliadora
