DILI, 23 Jullu 2025 (TATOLI) – Ekipa mista voleiból praia husi Timor-Leste hakat ba finál Jogu Desportivu CPLP hafoin manán kontra dupla husi Mosambike.
Iha kompetisaun ne’e, Timor-Leste reprezenta husi Miguelia Pereira Ximenes (1) no Noeh Deo Gracias (2) no Mosambike husi Alaima Ama Mahumane (1) no Arnoldo Nhantumbo (2).
Iha set dahuluk Mosambike la fó fatin ba ekipa uma-na’in atu manán, nune’e parte dahuluk termina ho pontu 21 ba Mosambike no Timor-Leste 19.
Hakat fali ba set daruak nian, Timor-Leste mós hatudu kedas sira-nia forsa no domina bola hodi hadau fali pontu no manán Mosambike ho 21-12.
Tanba ekipa rua ne’e manán iha set idaidak maka kontinua hakat ba set desizaun nian, nune’e jogu komesa manás tanba hadau malu iha pontu, maibé Timor-Leste pasa no simu bola ho di’ak, nune’e halakon Mosambike ho pontu 15-13.
Atleta Noeh Deo Gracias orgullu bele lori Timor-Leste hakat ba finál kontra ekipa mista husi Portugál.
“Aban ita joga hasoru Portugál. Hothotu hatene katak Portugál nu’udar ekipa forte liu, maibé ami sei halo esforsu másimu iha kampu. Manán ka lakon ne’e depende jogu, importante mak ita hakat to’o finál”, nia espresa.
Tuir oráriu, kompetisaun finál voleiból mistu sei realiza iha aban dadeer tuku 09h00 no iha tuku 15h00 ekipa voleiból maskulinu husi Timor-Leste no Mosambike sei hadau terseira klasifikasaun.
Iha tuku 16h00, finál voleiból praia maskulinu Portugál kontra Kabuverde no voleiból femenina husi Timor-Leste hasoru Portugál.
Notísia relevante: Timor-Leste no Portugál hasoru malu iha finál voleiból femeninu
Jornalista: Arminda Fonseca
Editora: Maria Auxiliadora
