DILI, 23 Jullu 2025 (TATOLI) – Ekipa femenina husi Timor-Leste no Portugál hakat ba finál voleiból praia hafoin halakon nia adversáriu Mosambike no Kabuverde, ho set rua de’it.
Iha kompetisaun ne’e Timor-Leste reprezenta husi Miguelia Pereira Ximenes (1) no Augusta Belo (2) hasoru ekipa husi Mosambike, Alaima Ama Mahumane (1) no Aurea (2). Enkuantu Portugál ne’ebé reprezenta husi Matilde Silva (1) no Inês Silva (2) defronta Catarina Fonseca (3) no Maria Clara Lima Mauro (4) husi Kabuverde.
Iha eventu ne’e, Timor-Leste hatudu kedas sira-nia jogu ne’ebé di’ak hodi halakon Mosambike iha set dahuluk ho pontu 21-15 no daruak 21-19.
Iha sorin seluk, jogu entre Portugál no Kabuverde, fó vitória ba Portugál ho marka pontu 21-12 iha set primeiru no daruak 21-18.
Depoizde jogu, atleta timoroan Miguelia Pereira Ximenes agradese tebes tanba bele hakat ba finál voleiból praia nian. “Agora, manán ka lakon iha finál jogu mak sei termina, importante mak ami to’o finál”, dehan.
Iha sorin seluk, atleta husi Portugál, Inês Silva, satisfeita ho trezultadu tanba sempre manán iha jogu no hakat ba finál.
“Ami agradese tebes, tanba ami to’o ona finál. Ami sei halo esforsu treinu di’ak liután para manán iha finál”, dehan.
Jogadora portugeza Matilde Silva kontente tanba sira-nia partisipasaun iha jogu ne’e foin ba dahuluk lori nasaun nian naran, entaun sei halo esforsu para manán iha jogu tuirmai. “Ami sei halo esforsu hamutuk, nune’e manán medalla lori fila bá ami-nia uma”, nia asegura.
Relasiona ho vitória Timor-Leste iha jogu ne’e, Treinadór no Koordenadór Voleiból Praia Timor-Leste, Mario Bento Soares, promete katak sei esforsu, liuliu iha prepara tátika nian atu jogadora sira nafatin koopera iha jogu.
“Ita rekoñese postura Portugál aas metru 2, ita ida de’it. Maibé ami halo esforsu atu jogadora sira manán iha terrenu no garante katak medalla osan-mutin iha ita-nia liman, agora hadau mak osan-mean”, dehan.
Notísia relevante: Portugál avansa ba semifinál voleiból mistu
Jornalista: Arminda Fonseca
Editora: Maria Auxiliadora
