DILI, 24 jullu 2025 (TATOLI)— Ekipa xadrez portugés hatudu dala ida tan ninia domíniu iha jogu CPLP XII hodi manán medalla osan-mean iha kategoria Xadrez Blitz Mistu/ Mixed Blitz Chess, ne’ebé realiza iha Sentru Konvensaun Dili (CCD-sigla portugés), Timor-Leste, iha loron-Kinta loraik (24/07).
Jogu ne’ebé kompostu hosi ronda lima no nasaun CPLP neen, hahú iha tuku 3:00 lokraik OTL. Portugál hala’o ho di’ak, halakon ekipa lima seluk no akumula pontu 10 ne’ebé perfeitu, asegura fatin dahuluk no lori medalla osan-mean ba uma.
Realizasaun ne’e marka Portugál medalla osan-mean dahaat iha xadrez iha CPLP XII, tanba antes ne’e domina ona kategoria Xadrez Rápidu Mane no Feto.
Angola tuir iha fatin daruak ho pontu 8, rejista vitória haat no lakon de’it ho Portugál. Angola hetan medalla osan-mutin.
Funu ba terseiru lugar ne’e maka’as tebes tanba Ekipa Timor-Leste ho Cabo Verde hetan pontu 4 hanesan. Maski nune’e, pontuasaun individuál mak 3+1 ba Ekipa Cabo Verde no 2.5+1.5 ba Timor-Leste. Rezultadu ne’e hamosu debate entre treinadór no árbitru sira. Hafoin diskusaun besik minutu 20, foti desizaun hodi fó medalla bronze ka osan-metan ba ekipa rua ne’e.
Entretantu, Ekipa São Tomé e Prínsipe no Ekipa Mosambike remata kompetisaun ho pontu 2 ba kada nasaun.
Lista Partisipante sira Kategoria Blitz Mistu nian kompostu husi:
– Ekipa Portugal: Matviy Faryma (2009, Blitz Rating 2181) no Sofia Moreira Lopes Rosas Valente (2010, Blitz Rating 1902)
– Ekipa Angola: Célio Alexandre David Tchilulo (2011) no Daniela de F. Santana da Cruz (2011)
– Timor-Leste Team: Rivanho Viegas (2009, Rating Blitz 1691) no Lizete de Sousa (2011)
– Ekipa Cabo Verde: Celton Manuel Sousa Ramos (2009) no Akiane Patricia Brito Moreno (2010, Blitz Rating 1530)
– Ekipa São Tomé e Príncipe Ekipa: Daniel da Costa Fernandes Ramos (2013) no Emelissa Mallone do Ó de Moura (2009)
– Ekipa Mosambike: Denilson Felipe Simbine (2008) no Ayrine Calumia Ismael (2009)
Hafoin fó sai rezultadu jogu ne’e, medalla sira aprezenta hosi reprezentante Governu Timor-Leste, delegadu hosi nasaun membru CPLP, hamutuk ho delegadu hosi Federasaun Internasionál Xadrez, Federasaun Xadrez Cabo Verde, no Federasaun Xadrez Timor-Leste.
Xadrez iha Jogu XII CPLP 2025, fahe ba kategoria tolu: Klásiku (Padraun), Rápidu, no Blitz. Torneiu ne’e hala’o kedas husi loron 21 fulan Jullu no sei remata iha loron 25 fulan Jullu tinan 2025, ho supervizaun maka’as husi árbitru nasionál na’in sia husi Timor-Leste no árbitru internasionál na’in haat husi Portugál, São Tomé e Prínsipe, no Cabo Verde.
Jornalista: Cidalia Fátima
Editora: Armandina Moniz
