DILI, 16 Juñu 2026 (TATOLI)—Komité Olímpiku Nasionál Timor-Leste (CONTL-sigla portugeza) hala’o asembleia jerál hodi hili estrutura foun ba mandatu 2026–2030, iha-ne’ebé Francisco Kalbuadi Lay re-eleitu nu’udár prezidente iha asembleia referida.
Asembleia jerál ne’ebé realiza iha Timor Plaza, Dili, 14 Juñu 2026, ho delegadu hamutuk 25 ne’ebé reprezenta Federasaun Desportiva Nasionál sira ho unanimidade hili hikas Francisco Kalbuadi Lay nu’udár CONTLL ba mandatu foun tinan haat.
Votasaun ho unanimidade ne’e reflete konfiansa no fiar boot ne’ebé federasaun sira fó ba-nia lideransa no kompromisu iha dezenvolvimentu desportu no movimentu olímpiku iha Timor-Leste.
Iha nia intervensaun depoizde eleitu, Prezidente Eleitu, Francisco Kalbuadi Lay hato’o agradesimentu ba federasaun nasionál sira hotu tanba sira-nia apoiu no konfiansa ba nia.
“Ha’u hakarak hato’o obrigadu ua’in ba federasaun nasionál sira hotu ba konfiansa ne’ebé fó mai ha’u. Re-eleitu ida-ne’e la’ós de’it onra ida ba ha’u pesoalmente, maibé mós responsabilidade koletiva ida atu kontinua hametin desportu iha Timor-Leste, apoiu ami-nia atleta sira no promove valór olímpiku sira iha nasaun tomak,” Prezidente Lay dehan.
Lay reafirma nia kompromisu atu servisu hamutuk ho membru federasaun sira hotu, instituisaun governamentál, atleta, treinadór no parseiru sira atu kontinua hasa’e dezenvolvimentu desportu no aumenta partisipasaun no kompetitividade Timor-Leste iha kompetisaun rejionál, kontinentál no internasionál sira.
Asembleia jerál mós halo apresiasaun ba progresu no rezultadu ne’ebé hetan durante mandatu liubá no diskute prioridade estratéjika sira ba tinan haat tuirmai. Prioridade sira-ne’e inklui dezenvolvimentu atleta sira, fortalese kapasidade organizasaun desportiva sira, promosaun boa governasaun no preparasaun ba kompetisaun internasionál importante sira.
Portantu, iha abertura ne’e, Ministru Juventude, Desportu, Arte no Kultura, Nelyo Isaac Sarmento, komprometidu kontinua apoiu dezenvolvimentu desportu iha Timor-Leste.
Nia subliña Komité Olímpiku Nasionál tenke sai parseiru estratéjiku ida ba Governu hodi hametin dezenvolvimentu desportu no promove oportunidade ba atleta timoroan sira iha nivel nasionál no internasionál.
Biban ne’e, nia agradese ba membru federasaun sira hotu, delegadu sira no parte interesada sira-ne’ebé kontribui ba susesu asembleia jerál ida-ne’e, hodi halo kompromisu atu kontinua hametin kolaborasaun ho parseiru sira hotu hodi promove no dezenvolve desportu iha Timor-Leste.
Jornalista: Osória Marques
Editór: Xisto Freitas da Piedade
