DILI, 26 Jullu (TATOLI) – Primeiru-ministru Kamboja nian, Hun Manet, apoia proposta Malázia hodi implementa sesárfogu ida ho viziñu Tailándia.
Viziñu rua sudeste aziátiku nian agora daudaun trava hela iha sira-nia funu maka’as liu iha dékada ida nia laran, ne’ebé maka Anwar Ibrahim hosi Malázia, nu’udar mós prezidente husi bloku rejionál ASEAN, buka atu rezolve ho dalan amigável.
“Xave hodi rezolve konflitu armadu atuál entre Tailándia ho Kamboja maka vontade jenuína hosi parte tailandeza nian hodi aseita sesárfogu ida,” Primeiru Ministru Kamboja informa liuhusi Facebook, sesta ne’e.
Tailándia no Kamboja troka tiru artillaria maka’as ba loron daruak iha loron-sesta ne’e, bainhira sira nia kombate aat liu iha dékada ida nia laran aumenta no espalla ba zona foun sira, maski iha apelu internasionál sira ba sesarfogu.
Pelumenus ema na’in 16 maka mate no ema rihun sanulu resin sai dezlokadu iha funu fronteira ne’ebé maka aumenta.
Parte rua fó sala ba malu tanba hahú konflitu no iha loron-sesta ne’e aumenta tan retórika, Tailándia akuza Kamboja hodi halo alvu deliberadamente ba ema sivíl sira no Kamboja alega katak Tailándia uza kilat-musan sira, armamentu ida ne’ebé kontroversu no kondenadu tebes.
Notísia relevante: PM Interinu Tailándia simu ho laran-haksolok ho mediasaun Malázia nian
TATOLI
