BOBONARU, 29 Jullu 2025 (TATOLI)—Negosiante balun iha Domingu semana kotuk no Segunda horisehik ne’e hahú sobu rasik ona baraka iha merkadu lokál Ili-bole ne’ebé durante sira harii hodi halo atividade negósiu.
Negosiante sira ho konxiénsia sobu rasik fatin negósiu hirak-ne’e hodi kumpri notifikasaun daruak ne’ebé Autoridade Munisipál Bobonaru fó katak hahú husi lorom 21 fulan-Jullu to’o loron 30 fulan-Agustu 2025 ne’e tenke konstrui hotu uma no muda ba parte kotuk, tanba konsidera atividade negósiu iha fatin referidu okupa espasu públiku no ba futuru sei afeta ba alargamentu estrada diresaun kapitál Maliana Vila ba Postu Admitrativu Bobonaru no Lolotoe.
Negosiante Elsa Sose Mau informa katak totál baraka haat mak na’in sobu tiha ona.
“Agora ita haree uma-oan haat mak na’in sobu tiha ona. Ami-nia tun mai ne’e no sa’e ba ne’e parese Sábadu ho Domingu hanesan ami sobu ona, tanba ami presiza kalén sira halo fali baraka foun hodi fa’an modo hodi buka ami-nia moris,” nia informa ba jornalista TATOLI iha nia negósiu fatin, Tersa ne’e.
Notísia relevante: Governu fó prazu fulan ida ba negosiante hamamuk merkadu Ili-bole
Aleinde ne’e, negosiante Feliciana Soares promete iha semana ne’e sira sei sobu hotu baraka no kioske, maibé Governu ho Autoridade Munisipál Bobonaru mós tenke prepara kedas kondisaun.
Sorin seluk, abitante Postu Administrativu Bobonaru, Aleixo de Jesus Lopez konkorda ho planu no desizaun Governu ho Autoridade Munisipál Bobonaru tanba fulan oin Krúz Internasionál husi Koreia sei liuhusi fatin ne’e.
“Ita sei simu pregrinu barak husi rai-laran no rai-li’ur. Ema mai haree fatin hanesan ne’e ita sente ne’e imajen ladún di’ak,” Aleixo argumenta.
Enkuantu, Autoridade Munisípiu Bobonaru fó notifikasaun ne’e bazeia ba Dekretu-lei Nú. 33/2008, 27 Agustu, artigu 4 númeru 3 kona-ba atividade komersiál labele taka estrada públiku no trotoár sira.
Tuir observasaun jornalista TATOLI iha terrenu nota katak atividade negósiu iha merkadu lokál ne’e sei kontinua la’o normál hanesan baibain.
Negosiante sira-ne’ebé daudaun ne’e negosíu kuaze 20-resin maihusi Suku Oe-leu, Postu Administrativu Bobonaru no Suku Odomau ho Suku Raifun, Postu Administrativu Maliana.
Jornalista: Sergio da Cruz
Editór: Xisto Freitas da Piedade
