VIKEKE, 19 Juñu 2026 (TATOLI)–Ekipa husi Institutu Jestaun Ekipamentu Apoiu ba Dezenvolvimentu Infraestutura, Institutu Públiku (IGEADI, I.P.) hahú halo normalizasaun mota Irabere ne’ebé fó ameasa ba natar no torre eletrisidade iha Suku Irabin de Baixo, Postu Uatukarbau, Munisípiu Vikeke.
Xefe Suku Irabin de Baixo, Postu Uatukarbau, José Baptista do Carmo, haktuir ekipa husi IGEADI horisehik (18/06) destaka hotu ona ekipamentu pezadu (eskavatór) ida (1) no bolduzer ida (1) iha mota Irabere laran liuliu bee dalan ne’ebé ameasa ba natar no torre eletrisdade nian.
Notísia relevante: Mota Irabere ameasa natar Baidubu no torre óliu pezadu iha Suku Irabin de Baixo
“Kona-ba normalizasaun ba mota Irabere ne’ebé agora fó ameasa ba torre eletrisidade no natar Baidubu nian ne’e, horisehik ita-nia ekipa husi IGEADI lori ona ekipamentu pezadu sira ba tau iha mota Irabere para halo normalizasaun ba mota referida,” José Baptista do Carmo ba TATOLI iha Postu Uatukarbau, Sesta ne’e.
Maibé, nia dehan, ohin seidauk halo normalizasaun tanba sei halo serimónia kulturál iha mota Irabere, nune’e ekipa halo servisu karik labele hetan buat ruma, tanba ne’e mak seidauk halo normaliza.
“Loloos ne’e, ohin ita-nia ekipa sira seidauk halo normalizasaun tanba ita-nia lia-na’in sira husi Suku Irabin de Baixo, ohin ne’e ita halo serimónia rituál ida para ekipamentu no ema halo normalizasaun labele hetan buat ruma. Tan ne’e mak ita-nia ekipa sira seiduak halo normalizasaun,” nia akresenta.
Tuir nia, servisu normalizasaun ekipa IGEADE sei hahú normaliza iha segunda semana oin hahú taka bee dalan ne’ebé agora ameasa ba natar no torre eletrisidade.
“Distánsia mota ne’ebé agora tama ba área natar ne’e kuaze kilo ida, nune’e ekipa sira dehan katak servisu sei fulan ida mak foin konklui tanba volume servisu boot. Normalizasaun ne’e, ekipa IGEADI sei taka rai henek hodi satan bee mota nian, atu tempu mota tun karik labele ba natar no torre eletrisidade,” nia akresenta.
Entretantu, normalizasaun ne’e atu asegura populasaun benefisiáriu ba natar Baidubu husi Suku Irabin de Baixo ho totál hamutuk ema na’in-2.624 no normaliza ne’e sei proteje natar Baidubu totál ektare 150 inklui proteje torre eletrisidade.
Jornalista: Vitorino Lopes da Costa
Editór: Xisto Freitas da Piedade
