OEKUSI, 30 Jullu 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato, akompaña husi Diretór Diresaun Rejionál Infraestrutura (DRI), kuarta ne’e, hala’o enkontru kortézia ho Tribunál Primeira Instánsia Oékusi.
Iha ámbitu ne’e, Juís Administradór, Evangelino Belo, aprezenta problema rua ba Prezidente Autoridade RAEOA, atu apoia halo reabilitasaun ba sala-detensaun, harii fatin ba objetu aprendidu no mós fatin arkivu nian.
“Buat ne’ebé ami rekomenda ba Prezidente Autoridade, iha asuntu rua, iha posibilidade atu ajuda tribunál karik, bele halo reabilitasaun ba sala detensaun ne’ebé iha tribunál Oekusi, laiha kondisaun atu asegura ita-nia maluk detidu ka prizioneiru sira-ne’ebé bainhira mai tuir julgamentu iha ne’e. Ami husu mós karik bele apoia atu harii fatin ba objetu aprendidu no mós fatin arkivu nian. Ida-ne’e ami-nia sujestaun karik iha posibilidade atu apoia ami,” Juíz Evangelino Belo dehan, iha ámbitu enkontru kortezia ne’ebé hala’o iha tribunál Oekusi, Kuarta ne’e.
Autoridade Judisiáriu ne’e sente orgullu tanba foin dahuluk, Autoridade RAEOA observa direita kondisaun no serbisu administrasaun sira iha Tribunál Primeira Instánsia Oekusi, nune’e bele enkoraja funsionamentu tribunál bele la’o ho di’akliu-tan.
Hafoin ramata sorumutu ofisiál ne’e, parte tribunál konvida Prezidente Autoridade RAEOA, hala’o vízita iha arredór komplexu tribunál nian, hodi observa direita kondisaun sala administrasaun sira, sala julgamentu, inklui sasán aprendidu sira.
Notísia relevante:Ministru Sérgio ho PA REAOA diskute atu mellora setór justisa iha Oekusi
Iha biban ne’e, Prezidente Autoridade RAEAO, fó hanoin ba parte tribunál, atu aprezenta pedidu proposta ofisiál ida atu submete ba Gabinete Prezidente Autoridade RAEOA, nune’e bele konsidera atu apoia iha futuru.
“Ha’u mai haree kondisaun serbisu no fatin balu, oinsá bele halo kooperasaun institusionál, ita hotu serbisu ba Estadu ida de’it, entaun ita tenke iha kondisaun, tan ne’e mak mai ha’u atu haree. Ohin, tribunál hato’o sira-nia preokupasaun, ne’ebé ha’u informa ba sira, atu halo surat ida hato’o mai ha’u, labele ko’alia de’it, hakerek saida de’it mak sira presiza, atu ami haree, oinsá mak bele ajuda tuir kbi’it no kapasidade ne’ebé Autoridade RAEOA iha, tanba Oekusi nu’udar rejiaun autonomu espesiál,” nia informa iha tribunál Oekusi.
Notísia relevante:Hakbesik justisa, Autoridade judisiál Oekusi planeia reativa tribunál movel
Tuir observasaun jornalista Ajénsia Tatoli, I.P, sasán aprendidu ka objetu sira hanesan motorizada, karreta tau de’it iha li’ur no laiha fatin ka uma atu sai mahon ba objetu sira-ne’e.
Notísia relevante:Tribunál Primeira Instánsia RAEOA rejista kazu pendente 492
Jornalista: Abílio Elo Nini
Editór: Rafael Ximenes de A. Belo
