OEKUSI, 23 Juñu 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, tersa ohin, presta omenajen no hato’o falesimentu ho laran triste ba maktoban Saudozu Francisco Guterres ‘Lú Olo’, ne’ebé hakotu ona ninia peregrinasaun iha mundu iha loron 22 fulan-Juñu 2026 ne’e.
“Ha’u reprezentante komunidade Oekusi Ambeno tomak, ami hato’o sentidu kondolénsia no sentidu triste profunda ba ita-nia aman lideransa nasionál, Komandante FALINTIL, no eis-Prezidente Repúblika, atuál Prezidente Partidu FRETILIN, Doutor Francisco Guterres ‘Lu Olo’, ne’ebé hakotu ona ninia peregrinasaun iha mundu ne’e, nu’udar jerasaun foun laran triste tebes tanba aman funu na’in-ida, lakon ona povu nia leet, adeus maun Lú Olo, ita-nia naran sei moris nafatin iha povu Timor-Leste nia matan, husi jerasaun ba jerasaun,” nia deklara hafoin presta omenajen iha salaun Gabinete Autoridade Oekusi, tersa lorokraik ne’e.
Notísia relevante:Lú Olo estadista ne’ebé hatudu responsabilidade ba Estadu
Autoridade ne’e aprofunda liután katak, nu’udar jerasaun patriota no povu patriota hato’o espresaun, reprezenta hato’o sentidu emosionál ba funu na’in-sira hothotu, liliu maktoban Saudozu Francisco Guterres ‘Lu Olo’, ne’ebé husik ona povu Timor-Leste tomak no mundu ne’e.
Tanba ne’e, nia hateten, atu impresta liafuan husi lideransa nasionál sira katak aman funu-na’in FALINTIL, Francisco Guterres ‘Lú-Olo’ rai hela RDTL Independente ne’e ba povu Timor-Leste hodi kontinua tane aas nafatin, no kuida temi nafatin ligasaun emosionál povu no lidér sira eterna.
Esprensaun ida-ne’e, importante tanba jerasaun ho lideransa nasionál sira, no líder funu-na’in sira FALINTIL, inklui maktoban mai husi istória ida, no mai husi prosesu ida-ne’ebé halo ona ba rai doben Timor-Leste to’o ohin loron.
“Loron ida, tuir planu Nai Maromak kuandu husik mundu, rai hela ukun aan ne’e sente lakon la’ós tanba hanesan Eis-Prezidente Repúblika maibé nu’udar luta-na’in ida ba Timor-Leste nia independénsia, ita haree katak iha ligasaun emosionál, tanba istória ita-nia jerasaun ho ita-nia aman sira ne’e, la hanesan istória uluk nian, nune’e hanesan jerasaun patriota, ha’u sente ita hotu lakon aman funu-na’in FALINTIL ida, maibé ida-ne’e planu Maromak nian, ne’ebé ita kontinua fó omenajén ba nia,” nia katak.
Notísia relevante:Don Leandro sei prezide misa requiem ba eis-Prezidente Lú Olo iha sesta-feira
Lideransa RAEOA ne’e afirma, omenajen husi povu Oekusi hanesan Rejiaun Enklave RDTL ida iha nasaun seluk nia leet, ho falesimentu, no omenajen jerasaun sira ne’ebé kontinua lori estafeta RDTL ne’ebé livre.
“Nune’e nafatin legadu ida-ne’e, tau nafatin iha fuan, tau iha povu nia orgullu, katak hamutuk ho líder sira, mezmu ohin loron ida-idak tuir planu Nai Maromak ba vida katak loron ida tenke fila-fali ba Nai Maromak tenke hanoin nafatin, no memória ida-ne’e, tenke vivu nafatin,” nia afirma.
Notísia relevante:Lú Olo entrega hela Timor-Leste ba timoroan sira luta kombate mukit-dezempregu
Enkuantu Saudozu Francisco Guterres ‘Lú-Olo’ moris iha Osú Munisípiu Vikeke iha loron 07 Setembru 1954, no hakotu nia peregrinasaun iha mundu ne’e ho idade 71, iha Ospitál Prince Court iha Kuala Lumpur, Malázia, iha ne’ebé nia simu hela tratamentu médiku intensivu, iha loron 22 fulan Juñu 2026 ne’e.
Notísia relevante:RAEOA fó onra ba Maktoban Eis-Prezidente Francisco Guterres “Lú Olo”
Jornalista: Abílio Elo Nini
Editór: Rafael Ximenes de A. Belo
