OEKUSI, 23 Juñu 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, tersa ohin, alerta no husu ba komunidade Oekusi tomak hodi halo lutu nasionál no hasa’e bandeira RDTL iha uma oin ho meia-aste, atu fó onra ba maktoban Saudozu Francisco Guterres ‘Lú Olo.
Régio da Cruz Salu, hateten, Estadu no Governu ema hotu nian, ne’ebé daudaun ne’e dekreta lutu Nasional ba Maktoban Francisco Guterres Lú Olo durante loron hitu. Nune’e hanesan Prezidente Autoridade RAEOA nia mós apela ba komunidade Oekusi, hodi hasa’e bandeira, no daudauk ne’e orienta ona ekipa Gabinete Prezidente Autoridade RAEOA hodi hasa’e bandeira no meia haste inklui iha uma oin idak-idak.
“Komesa horsehik kedas, ha’u apela nafatin ba joventude sira, no família hotu, Maromak nia planu hanesan ne’ebe ita hotu, aban bairua to’o tempu ita sei filafali ba iha Nai kriadór. Entaun husu espesial ba ita, hodi halo tuir saida maka dekreta ona husi Estadu no Governu nian katak loron 7 ita hakmatek ho orasaun, reza nafatin ba ita-nia lideransa Nasional, povu patriota sira, nune’e nai Maromak akompaña Maktoban Fransisco Guterres Lú Olo,”, nia informa iha Gabinete Oekusi, tersa lorokraik ne’e.
Nia informa, ema hotu reza ba ida-idak nia klamar hodi hetan bensaun, no hakmatek durante loron 7 ka semana ida, hodi akompania prosesu ne’ebé maka lideransa nasionál, maktoban to’o nia fatin deskansa ikus ne’ebé Estadu planeia ona.
“Oekusi oan sira, família, joventude no inteletuál sira hotu, halo tuir saida maka Governu dekreta ona, atu hasa’e bandeira ho meia-haste, nune’e mós tenki evita barullu, iha tempu kalan tanba agora akompaña kopa mundiál, husu hodi labele halo barullu, labele hakilár, labele haksesuk malu, tanba daudaun ne’e Timor-Leste lutu hela ba lideransa Nasionál atuál Prezidente Partidu FRETILÍN, Francisco Guterres Lú-Olo, ne’ebe fila ona ba Aman Maromak nia Kadunan Santo”.
“Ba Eskola sira iha Oekusi tomak, tenke halo orasaun, no tenke akompaña informasaun liuhusi kanál mídia nasionál sira, ba Saudozu Eis-Prezidente Repúblika Lú Olo ninia prosesu husi inísiu, to’o funebre,” nia apela.
Notísia relevante:Autoridade Kovalima apela ba komunidade hakmatek fó omenajen ba saudozu Lú Olo
Prezidente Konsellu-Veteranu Oekusi, António da Conçeição, daudaun ne’e mós simu ona orientasaun husi nasionál, atu organiza misa no kari ai-funan, hodi pesta omenajén ikus ba saudozu Francisco Guterres Lú-Olo.
“Ami simu ona orientasaun husi CCLN nasionál katak, hasa’e bandeira ne’e iha ai-riin nia klaran de’it, no iha mós orientasaun katak sei selebra misa no kari ai-funan, ne’ebé ita sei koordena ba parte hotu, igreja Autoridade RAEOA no parte hothotu, kona-ba data fiksa atu selebra misa ne’e, ne’ebé agora ami sei koordena hela, tanba saudozu nia mate halo ita laran triste tebes, tanba ita-nia aman sei forsa hela, maibé tanba planu Maromak nian, ita hotu kumpre, maibé ita nafatin reza ba nia klamar atu hetan moris ho dame iha lelehan,” nia hateten.
Notísia relevante:Ramos-Horta fó omenajen ba Lú Olo no destaka nia eransa ba nasaun
Enkuantu Saudozu Francisco Guterres ‘Lú Olo’ moris iha Ossú Munisípiu Vikeke iha loron 07 Setembru 1954, no hakotu nia peregrinasaun iha mundu ne’e ho idade 71, iha Ospitál Prince Court iha Kuala Lumpur, Malázia, iha ne’ebé nia simu hela tratamentu médiku intensivu, iha loron 22 fulan Juñu 2026 ne’e.
Jornalista: Abílio Elo Nini
Editór: Rafael Ximenes de A. Belo
