DILI, 05 Agostu 2025 (TATOLI)-Joven lubun ida, ho antusiazmu no obrigadu aprende pasiensia forma liña naruk, hodi hetan formuláriu ba vaga Polísia Nasionál Timor-Leste ne’ebé loke ba ajente hamutuk 400 no ofisiál 100.
Munisípiu Dili presiza ema na’in-48, maibé dadeer de’it, joven sira ne’e nakonu ona aredór komandu munisípiu Dili iha Kaikoli, no akademia PNTL Komoro Dili, ne’ebé sai sentru ba inskrisaun husi munisípiu hotu.
Notísia relevante: Rekrutamentu membru PNTL sei fahe kuota hanesan iha kada Munisípiu
“Ha’u hakarak tuir rekrutamentu ne’e, husi ha’u-nia hakarak atu servisu ba povu no Nasaun liuliu ba ita-nia rai doben ida-ne’e”, Elizio Robino dos Santos Gama joven ho idade 21 haktuir ba jornalista sira iha Kaikoli.
Joven ida husi foin-sa’e lubun ne’ebé iha formatura laran ne’e husu ba ekipa juri atu labele uza sistema família iha prosesu rekrutamentu no espera sei akontese transparensia iha prosedimentu tomak.
Oportunidade ne’e, Elizio Robino dos Santos Gama hato’o nia gratidaun ba governu tanba loke ona rekrutamentu ba membru polísia foun. “Kuandu ha’u liu vaga ne’e, ha’u servisu ho profisionál”.
Joven seluk, Clareta Daniela Xavier Martins no Daniela Tavares hato’o sentimentu kontente. “Ami tuir vaga rekrutamentu membru polisia foun ne’e mai husi inisiativa rasik hakarak kontribui ba ita-nia nasaun no povu ida-ne’e”, hatete joven na’in rua ne’e, ne’ebé forma besik malu.
Kandidatu sira forma tuir liña feto no mane, la kahur malu.
Selesaun hahú ho konfirmasaun ba rekezitu sira
Komandante PNTL Munisípiu Dili, Superintendente Xefe Polísia Orlando Gomes, hateten selesaun hahú ho konfirmasaun dokumentu ne’ebé kandidatu sira tenke prenxe tuir rekezitu ne’ebé anúnsiu ona.
Selesaun inisiál ne’e hahú ho konfirmasaun idade tenke 23 to’o finál 2025, altura tenke 158 ba feto, mane 165, laiha tattoo iha isin-lolon no kompleta dokumentu hotu ne’ebé temi ona iha kritéria. Inisiu ne’e hanesan rekezitu ida hodi foti formuláriu ba aplikasaun vaga. Kuandu prosesu konfirmasaun mak la prenxe rekezitu, automatikamente eleminadu.
Enkuantu, kandidatu balun ne’ebé la konsege kompleta dokumentu balun, ekipa juri sei fó tempu atu kompleta tuir loron ne’ebé termina molok fó formuláriu.
Tuir observasaun jornalista TATOLI iha terenu, to’o tuku 12.30 laiha kandidatu ida mak eliminadu husi selesaun inisiál, enkuantu na’in tolu seluk mak haluha dokumentu iha uma, nune’e ekipa juri autoriza kompleta fali molok fó formulariu ba sira.
Vaga ne’e ba munisípi Ataúru na’in-10, Aileu-20, Ainaru-25, Baukau-40, Bobonaru-40, Kovalima-25, Dili-40, Ermera-37, Lautein-27, Likisá-26, Manatutu-25, Oekusi-25, Vikeke- 35, totál ba ajente hamutuk 400, enkuantu ba ofisiál na’in-100.
Notísia relevante: Rekrutamentu ba membru PNTL foun hahú aban
Jornalista : Natalino Costa
Editora : Rita Almeida
