OEKUSI, 06 Agostu 2025 (TATOLI) – Komandu Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA), kuarta ne’e, hahú abertura hodi distribui formuláriu rekrutamentu ba membru PNTL foun iha kuartel PNTL Oekusi.
Notísia relevante:MI orienta Komandu PNTL prepara kondisaun ba rekrutamentu membru foun
Komandante PNTL Oekusi, Superintendente Asistente Polísia, Angelo Quelo, informa katak, abertura ne’e loloos hala’o iha tersa-feira, 05 Agostu 2025 maibé dokumentu sira foin to’o Oekusi iha lorokraik.
“Nune’e ohin ita realiza sei to’o loron 29 Agostu 2025, ita simu no distribui formuláriu ba iha konkursu sira, depois sei prienxe rekezitu sira, ne’ebé distribuisaun formuláriu ne’e ita sukat kedas nia aas ho idade, molok simu formuláriu,” Angelo Quelo, ko’alia iha abertura iha kuartel PNTL Oekusi.
Autoridade polisiál ne’e informa, distribuisaun formuláriu ne’e sei iha tempu susfisiente tanba dokumentu sira-hotu sei submete fila-fali mai komandu, hahú husi loron 12 to’o 09 Setembru 2025, ne’ebé iha tempu-naruk atu trata dokumentu sira, iha autoridade lokál, xefe suku, jestór no PNTL postu adminsitrativu sira, deklarasaun inan-aman karik partisipa iha funu inklui deklarasaun husi konsellu veteranu.
“Ohin kuandu asesu ona formuláriu bainhira trata no submete ona dokumentu sira, ami husi prepara saúde ho didi’ak, halo ezersisíu prepara mós fizíku, no labele mete krime tuun-sa’e, atu labele impede fali idak-idak nia direitu hodi kompete iha PNTL, importante kumpre rekezitu ne’ebé anúnsia ona, no nafatin hatudu dixipliña,” nia apela.
Iha biban ne’e, kadete foun Sandra Ivania do Santos Teme, sente orgullu hafoin pasa atu asesu formuláriu, no promete sei kumpre rekezitu sira-ne’ebé komandu PNTL fó sai, tanba mehi ne’ebé nia espera, hakarak duni atu sai Polísia Nasionál Timor-Leste.
“Ha’u rasik sente orgullu tebes, tanba ha’u liu ohin, hodi asesu formuláriu ne’e, atu ba oin ha’u esforsa kompleta dokumentu sira seluk, ne’ebé ha’u garante sei kumpre rekezitu sira hotu, ne’e mak ohin mai maske ema barak, hamriik de’it iha loron manas, tanba ha’u hakarak duni atu sai PNTL atu serbí ita-nia nasaun ho responsabilidade. Ida-ne’e mak ha’u-nia mehi, la’ós ema mak obriga maibé ha’u hakarak sai polísia nasionál iha rai ne’e,” nia orgullu.
Notísia relevante:Rekrutamentu ba membru PNTL foun hahú aban
Observasaun Jornalista AjénsiA TATOLI,I.P, iha terrenu nota katak, molok distribui formuláriu rekrutamentu ne’e ba foinsa’e feto no mane iha árredór komandu PNTL Oekusi, ekipa fó uluk esplikasaun kona-ba kritéria sira ne’ebé define iha diploma ministeriál númeru 17/2025, 25 Juñu.
Prosesu distribui formuláriu hahú sukat kandidatu sira-nia altura tuir dekretu-lei ne’ebé fó ba feto tenke metru-1,58 no ba mane metru-1,65, hafoin pasa kontinua kedas simu formuláriu ne’ebé fahe ba oin tolu mak hanesan formuláriu jerál ba aplikasaun, formulariu ba xefe suku, administradór no komandante eskuadra sira-nia asina no formuláriu ba inan-aman veteranu sira nia oan.
Data distribuisaun formuláriu ne’e hahú iha loron 05 to’o 29 fulan-Agostu 2025, no iha loron 12 fulan-Agostu to’o loron 09 fulan-Setembru aplikante sira tenke submete filafali formuláriu ne’e hodi tama ba selesaun dokumentu.
Entertantu, kritéria sira ne’ebé define iha diploma ministeriál nú. 17/2025 maka:
- Sidadaun Timor-Leste
- Domina pelumenus lian ofisiál ida
- Sei klosan
- Iha kualifikasaun akadémika minimu 12° ano ka ekivalente
- Sidadaun entre tinan-18 to’o 23 to’o loron 31 fulan-dezembru 2025
- Aas minimu 1,58 m ba feto no mane 1,65 m Iha aptidaun fíziku no mentál rekoñesidu ba ezersísiu knaar polísia nian
- Iha kualidade morál apropriadu no komportamentu síviku neʼebé permite sira atu atua ho justisa, lealdade, integridade, onestidade, kompoténsia profesional, hodi hamosu konfiansa no respeita hosi populasaun no kontribui ba prestíjiu PNTL no instituisaun demokrátiku sira
- La hetan ezonerasaun hosi instituisaun Estadu nian seluk
- La hetan kondenasaun tanba krime internasionál sira
- Hatudu adekuasaun ba ezersísiu funsaun polísia nian, ne’ebé karakteriza ho la sai arguidu iha kualkér prosesu kriminál neʼebé la’o hela no mós la sujeita ba medida koesivu, akuzasaun formál, ka julgamentu krime internasionál ho ofensa kriminál ne’ebé hetan kastigu tinan tolu iha prijaun
- Disponivél ba kna’ar iha ne’ebé de’it iha territóriu nasionál, bainhira tuir no kompleta iha susesu CFA-PNTL, tuir nesesidade PNTL nian.
Distribuisaun vaga 400 ne’e ba munisípiu 12 inklui Ataúru no Rejiaun Administrativa Espesiál Oekusi Ambeno (RAEOA), Ataúru vaga ba ema 10, Aileu 20, Ainaro 25, Baukau 40, Bobonaro 40, Kovalima 25, Dili 40, Ermera 37, Lautein 27, Likisá 26, Manatutu 25, Manufahi 25, RAEOA 25, no Vikeke 35.
Jornalista: Abílio Elo Nini
Editór: Rafael Ximenes de A. Belo
