DILI, 07 Agostu 2025 (TATOLI)-Governu liuhusi Ministru Interiór, Francisco da Costa Guterres, hatete depozita konfiansa tomak ba komisaun juri iha rekrutamentu kadetis membru foun ba Polísia Nasionál Timor-Leste (PNTL).
“Ita depozita konfiansa ba sira ne’ebá, ita espera buat sira sei la’o iha transparénsia nia laran, ita la kestiona komisaun juri, liuliu sira ne’ebé juri iha rekrutamentu, sira-ne’e iha integridade no profesionalismu, ha’u fiar rekrutamentu ida-ne’e sei la’o ho transparénsia”, ministru hateten ba jornalista iha nia kna’ar fatin Vila-Verde, kinta-ne’e.
Tuir nia ekipa juri ne’ebé agora dadaun hola parte iha komisaun juri ba rekrutamentu, hothotu iha integridade no profisionál.
Nia husu ba jornalista no ema hotu atu kontribui fó sai informasaun ne’ebé kredivél, karik mosu irregularidade balun tenke fó hatene, nune’e komisaun no Ministériu Interiór toma medida ba pesoál ne’ebé komete irregularidade iha prosesu ne’e.
“Ita hakarak uza ema ne’ebé di’ak. Ita hotu-hotu tau matan para buat ne’e la’o di’ak, ita la’ós deskonfia malu, maibé ita hakarak hotu-hotu ajuda malu tau matan, ita hakarak polísia ne’ebé servisu di’ak, tanba ne’e ita hotu ajuda malu, hili ida ne’ebé di’ak”, nia fó-hanoin.
Iha fatin ketak Portavós Komisaun Juri ba rekrutamentu membru PNTL foun, Superintendente Polísia António da Luz, hatete ekipa juri ba rekrutamentu mak juri no sekretáriu.
Nia esplika, juri ne’e kompostu husi Prezidente ekipa juri lideradu husi Segundu Komandante Jerál Polisia Nasionál Timor-Leste (PNTL), Komisariu Pedro Belo, Vise rua mak Komandante Pessoa no Formasaun, Superintendente Xefe Arquimino Ramos no Inspetór Jerál Komandu PNTL, Superimtente Xefe Polísia Jorge Monteiro.
Ekipa juri seluk mak Komandante Operasaun Nasionál, Superintendente Xefe Polísia Justinho Menezes, Xefe Departamentu Komandu Pesoál, Superintendente Assistenste Polísia Graciano Moniz Amaral, Xefe Departamentu Jéneru, Superintendente Assistenste Polísia Maria Fatima Martins, Xefe Departamentu Saúde Klínika PNTL, Superintendente Assistenste Polísia Helena das Dores, Guarda Nasionál Republikanu (GNR), Koronél Nuno, portavós ekipa juri, Superintendente Polísia António da Luz.
“Ami garante katak servisu ho profisionál, ami sei la favorese ba ida de’it, tanba sidadaun hothotu iha direitu ba prosesu ne’e. Ami la haree ba A, la haree ba B, ami halo tuir de’it buat ne’ebé lei fó ba ami, katak ami sei servisu ho imparsiál. Ami la haree ba kór ka rasa, la haree ba ema ne’ebé mai husi pozisaun, tanba ami hakarak servisu ho profisionál atu hatudu ba públiku katak PNTL bele”, nia konklui.
Notísia relevante: MI orienta Komandu PNTL prepara kondisaun ba rekrutamentu membru foun
Jornalista : Natalino Costa
Editora : Rita Almeida
